Ar sngi chwa u sdang ka Hornbill Festival ka Nagaland kawa 10 sngi deiwa sdang ha ka 1 tarik u December kawa man leh ka sngikha ka jylla, neiliang u Montri Rangbah, u Neiphiu Rio ynne da thoh u chah u Home Minister ka ri, u Amit Shah yow pyndam noh ya ka Protected Area Permit (PAP) hapoh ka jylla yow suk kiwa na baar ri kiwa da ya krehlang ha kani ka tamasa yow psiah cha kani ka tamasa ha uni u snem.
U Neiphiu Rio ha ka chithi da ong u wa kani ka tamasa kawa 10 sngi pdiang sñiawbha ko ya kiwa uiñke suwari napoh ka ri kamjooh kiwa na baar ri heiwa da yarap ko leh yei kamai kajih kiwa chong chnong ka Nagaland.
Da pyntip u leh wa ha uni u snem da ya krehlang wa 6 tylli ki ri wa kynthup ya ka France, United Kingdom, Ireland, Austria, Malta wa Switzerland wei waroh i kaam dadep wow pynbait wei wow pdiang wot ya kiwa mihkhmat ka sorkar India.
Da pynkynmoo u wa ka sorkar Nagaland da boonsien da dawa ko wow pyndam noh ya ka PAP heiwa da yoh yei kular wow leh yeini tangwa ym em leh wei da pteiñ ko wow pynkrehkaam wei ini da ktah ko ye kamai kajih kamjooh yei naam ka jylla kam kawa em i chah ktah i chongsuk chongsaaiñ.
U Rio da ong u leh wa ka Nagaland toh kawa man kam ka dkhot ka National Democratic Alliance (NDA) da ki phaw snem wei da kyrpaad wow leh yeiwa emkaam.
Ka PAP toh kawa man kyrpang ya kiwa na baar ri wa emkaam ki wow yoh ka yow ye ki u psiah cha Nagaland, Manipur wa Mizoram heiwa da pyndam ka ha u 2011 ha kini ki jylla tangwa da pynkrehkaam biang ka ha u December 2024 deiwa khuslai ka sorkar pyrdi yei long i man ka thaaiñ.
Ha Nagaland kiwa man kam kiwa chong chnong ka ri hap ki wow yaleh ya ka ILP katwa kiwa na baar ri hap ki wow yaleh ya ka PAP deilang wa ka ILP.
Discussion about this post