Chirup wa ki khynnah wa duna hei bor khmat da lehkmen ya ka IDPD 2025 ha Nangbah

Ka sngi kiwa man kyrpang namo ka International Day of Persons with Disabilities (IDPD) 2025 da lehkmen ya ka ynnin ka sngi ha School of Mother Elizabeth for Visually Impaired Children, Nangbah, West Jaiñtia Hills District.

Ya kani ka lehkmen da pynman da ka Jan Vikas Samiti (JVS) Varanasi chirup wa ka Bethany Society Phramer deilang ka School of Mother Elizabeth dei kyrchaan ka Liliane Foundation, The Netherlands.

Ya i lehkmen da yahkhmat da ka Programme Coordinator ka Bethany Society, ka Risaka Challam, heiwa u Heimon Niang, BDO ka Thadlaskein Block da man u kam u kongsan katwa ka Dr. Dahunmon Mary Hadem kawa man ka Assistant Professor ka 12 Daloi Law College da man ko kam ka symbood kongsan.

Ka phang yong kani ka sngi toh kawa ong wow im wa kiwa man kyrpang ha ka imlang sahlang wow ku ka imlang sahlang liang wanang namo  “Fostering disability-inclusive societies for advancing social progress”.

Ki bru chemphang ha kani ka sngi toh ka Valiant Rose Mary Hadem, Member ka Juvenile Justice Board (WJHD) wa ka P. Wailad Christine Hadem, Psychologist.

Ya ki kyntien pdiang burom da yoh na u Henry Shylla uwa da klam chaphang i emkaam wow im deiwa emburom wei deiwa kduplang ya kini kiwa man kyrpang, heiwa ka Risaka Challam da e ko ya ki kyntien pynchlur wei wow e mynsien kamjooh leh i daw wa lehkmen ya kani ka sngi. 

U Heimon Niang da kdaw u yei myntoi na ka sorkar kam ka MGNREGA namo ki Job Card ya kiwa man kyrpang ya kiwa da kynjoh 18 snem i rta wei yei em ki ka bhah wa 4% ha ki kreh sorkar. Da pynchlur u leh ya ki khynnah wow bood ki ya ka nongmuna ka Helen Keller heiwa da yaroh u yei kreh chitom wei minot kiwa sikai ka skur.

Ka Valiant Rose Mary Hadem da klam ko yei hok kiwa man kyrpang khamtam kiwa dang khynnah heiwa emkaam u im ki ha ki thaw kiwa man chngaaiñ.  

Neiliang ka Dr. Dahunmon Mary Hadem, da batai ko ya ki kyndon kiwa em hapoh ka RPwD Act, 2016 heiwa da khana ko leh ya ka parom ki bru kiwa man kyrpang kiwa da jop wei kiwa man kam ki nongmuna ya kiwi tawon.

Related posts

Da pynkylla yei pyrtuid ka Raj Bhavan Shillong

December 4, 2025

Pynkup burom ka Dorbar Chnong Ialong ya u Wailadmiki | Pynbna u da ka Sub Centre

December 4, 2025

Ka P. Wailad Christine Hadem da batai ko hajrong i pynkhlan yei thij i pyrkhat khamtam hawa im ha ka imlang sahlang kawa pait khmat næ kyntait ya ki bru wa man kyrpang. 

Da yoh leh i klam e mynsien na u Thombor Lyngdoh uwa man u bru wa kyrpang uwa booh i dukan dai mar sapria wow pyndap ya ka yung u.

Ha kani ka sngi da pynka’it ya ki khynnah da ka Ball Bucket (Blindfold) ka Musical Chair wa kiwi kiwi.