Hei miet ka 4 tarik uni u bnai, u Symbood Montri Rangbah ka sorkar jylla, u Sniawbhalang Dhar da hiar u cha Lumtiniang Park ka chnong Mowtyrshiah, West Jaiñtia Hills District wow wai paidbah ya ki Light Decoration wa da pynriam ha kiwa boon ki rukom wa yoosuk bha ha uni u loom uwa man leh u loom wa ka-it ki paidbah wow uiñke pyngngaad.
Ha kani ka miet wai paidbah da emlang u MLA ka thaaiñ u Nujorki Sungoh, ki MDC ka JHADC wa kyntup ya u Bisonroy Iano wa u Wormanship Shadap, u Dolloi ka Elaka Raliang, u Chawas Lyngdoh kiwa yahkhmat ka chnong Mowtyrshiah wa ki marjan chnong najrong ki paidbah wa boon wa wan sakhi yeini i wai paidbah.
U Nujorki Sungoh hawa yaroh yei lai luti ka chnong Mowtyrshiah wow pynkhreh yeini i pynriam khrik-khrak deiwa wanrah heidur waphær waphær, da pynsñiaw haroh u yei lai luti yong oo hajrong kammon u kyntu kynrong ya kani ka thaw kawa man kam kawi wa sñiawsuk ki paidbah wow wanke pyngngaad khnang yow khriñ chooh chooh ya kiwa uiñke suwari.
Heijooh i por kyntu haroh u ya u Sniawbhalang Dhar wow yakrehlang u dei wow yarap booddien pynyoh ki Scheme wa dadep paan yarap ki ha kani ka thaw.
Neiliang u Sniawbhalang Dhar hawa klam ong u chisien wa da em ka thong wow pynku yei kaam uiñsuwari ha ka chnong ka thaaiñ, nyngkong hi toh u man kiwa biang i rukom pynwandur ya idæ hadooh ha ka imlang sahlang wa kynthup i khooid wow sdang chwa na jar jiar ki dwar ki pchem, u pynyoo yei kyllooid mynsien hawa yaklam khana wa kiwa wan uiñke suwari.
Lym em ya kani ka mynsien ym em yumut u wanrah i chna i tei heiyatoh wa i kaam uiñsuwari.
Seiwi leh ong u hawa kwah u ku ka Tourism toh u man kiwa yoo jngai ymtoh u man ware leh kiwa pynkhor namo wow man Strict næ kiwa e laitlan, tangwa u sñiawthooh heitæ i rukom wow yabianglang deiwa tipsap hi u pynwandur.
Heiyatoh wa i dawa ka chnong yow pynku chooh chooh ya kani ka thaw, u Sniawbhalang Dhar ong u ya kattæ ym pu ye u ong iyi iyi neibhah heiyatoh wa ka Tourism neiliang ka sorkar da rai ko wow chong pyrkhat chwa yow pait bniah iyi wa emkaam u leh ha ki thaw waphær waphær katkam wa yoo dawa i thaw, neibhah la bakla u chim rai daw man i chna wa sepai donhi, kamwa da em ki thaw wa ka sorkar pynlut ko da ki klur tangwa ym em man kawa pynmyntoi.
Ha ka yalang wa pynlai da u Tbn. H.Lapasam da yoh leh i klam na u waheh chnong ka Mowtyrshiah u Golden Change Dkhar wa kiwi.
Yeini i pynriam khrik-khrak da pynman da ka Lumtiniang Tourism Promoter Group, Mowtyrshiah.
Discussion about this post