U Ohiwot Laloo, u khon ka (L) Misily Laloo wa u (L) Sabut Jones Nongbri uwa na Ladthadlaboh, Jowai u kurim ka Merry Merza Najiar na Loomkyrwiang, Jowai neibynta ki kaam wa bha yong oo hei wow kyntu kynrong ya ki kaam ka Scouts-Guides hapoh ka District. Neiliang ka Bharat Scouts & Guides, National Headquarter, New Delhi ha ka 26 tarik u Khonchonglad ha ka 19th National Jamboree wa man ha ka jylla Lucknow, da pynkhroo ko yei pyrtuid i naam yong oo da ka Silver Star Award.
Ya kani ka Silver Star Award da e deiwa ki bor pait bor pynlai ka Bharat Scouts & Guides, National HQ, New Delhi pynchongyurim ki ya ki kaam wa bha yong u Ohiwot Laloo, kiwa da leh u nadooh u snem 1979 kam u khynnah skur (Scouts), uwa sikai (Scout Master) wa uwa kitkaam hapoh ka District Association yong ka Jaiñtia Hills District kamjooh ha ka jylla ha ka thong wow pynkhlan wei wow saindur yei man wamiat wabha ki khynnah deiwa embynta ha ka Scouts & Guides Movement.
Heipor iwa chimkti u wow man kam uwa yahkhmat ya ki khynnah Scouts-Guides hapoh ka District nadooh u snem 1988, hei pyrtuid yong ka Scouts-Guides Jowai Open Unit, da pynmih u hadooh 22 ngut ki khynnah Scouts-Guides kiwa dayoh ya ka National Award (Rashtrapati Award) wa 150 ngut ki Rajya Puraskar Scouts & Guides (State Award).
I embynta yong oo wa ka Scouts-Guides Movement ha ki 47 tylli ki snem khlem chongngiah man i kyrkhu wa khroo ya ki khynnah Scouts-Guides hapoh ka District kamjooh hapoh ka Movement waroh kawi deiwa e kti u yei sap i chemphang wei por wa kordor yong oo wow sdang chiboon ki kaam wa thymme wa kynthup ya ki Camping, Awareness Programme, Youth Exchange Programme hapoh ka District, ka jylla kamjooh cha baar kiwa man dei yakrehlang leh wa kiwi ki Department yong ka sorkar ha ka thong wow khriñ ya ki khynnah skur u ya embynta ki wa ka Movement wei wow saiñdur saiñdar leh yei miat i bha ki khynroo khyllood hapoh ka imlang sahlang yong ka chnong ka thaw.
U Ohiwot Laloo nadooh i por wa man u kam u Scouts hadooh katni da yohlaad u wow mihkhmat næ u embynta ha ki yalang waphær wa kynthup nadooh ki International Level, National Level, Regional Level, State Level wa man ha kylleiñ ki jylla ka ri India kamjooh cha baar wei sñiawsuk sñiawsarong u ong leh man u uwa nyngkong napyrdi ki Scouts Master yong ka ri-loom Jaiñtia u wow yoh yeini i naam i burom wei ini daman i leh i burom wa khroo ya ka yung ka sem, ka chnong ka thaw, ka ri wa ka jaitbru.
U Ohiwot Laloo hadooh katni dang man u kam uwa sikai yong ka Jowai Govt. Girl’s Higher Secondary School neitæ da ksooh u leh kam u Jt. State Secretary, Meghalaya Bharat Scouts & Guides, Headquarter Shillong katwa hapoh ka Indian Red Cross Society won da man u kam u District Secretary, Indian Red Cross Society, West Jaiñtia Hills Unit, Jowai.
Najrong ka Silver Star Award kawa da yoh ha uni u snem, kiwi de ki Award kiwa da yoh u Ohiwot Laloo hapoh ka Scouts-Guides Movement toh ka Medal of Merit ha u snem 2010, Long Service Medal Award ha u snem 2021 lyngba ka Meghalaya Bharat Scouts & Guides, Shillong neitæ won ka District Teacher Award ha u snem 2023, State Teacher Award ha u snem 2024 lyngba ka Meghalaya Education Department.
Ha lyndet ini i naam i burom wa da yoh u Ohiwot Laloo, e u i sñiawngooh sñiawburom wa khroo ya waroh ki khynnah Scouts, Guides, Rovers, Rangers, Scout Master, Guide Captain yong ki Unit waphær kiwa da yohlaad u wow embyntalang chirup ha kiwa boon ki kaam na ki por cha ki por kiwa man ka luti wow e bor e mynsien ya oo hei wow kreh ya ki kaam hapoh ka Scouts-Guides Movement.
Discussion about this post