Lehkmen ka MPUF yei dap 15 snem | Wan pynskem u Kyrmen Shylla ya ki dkhot thymme

Ka seiñ Meghalaya People’s United Front (MPUF) Central Body ynne ka sngi da lehkmen ko yei dap 15 snem i lai luti ko wow chakri ya ka imlang sahlang heiwa da pynman leh yei pynskem ya kiwa kitkaam wa thymme yong ka.

Ya ka yalang ynne da pynman ha Bosco Pnar, Jowai heiwa u Kyrmen Shylla, u MLA ka Khliehriat da man u kam u kongsan, u Lasky Rymbai u Dy. CEM ka JHADC da man u kam u symbood kongsan hei emlang u Jason Mairom, Addl. SP ka West Jaiñtia Hills.

U President ka seiñ, u Dapoi Wanmi Laloo hawa e i klam da ong u wa katni boon bha ki seiñbhalang tangwa boon na ki toh ki wym em u kreh yei kaam deiwa pynrap wa emkaam u yieñ hajrong ki kjat wow kyrchaan ya ka imlang sahlang heiwa da pynchlur ya ki dkhot wow khih u kreh ki khnang wow ye ki u yarap ya kiwi tawon i bru.

Da ong u wa kajiak chisien i kreh da man i dak wa dap 15 snem ka seiñ deiwa e khublei ya kiwa kitkaam wa ki dkhot ka seiñ waroh wa da kynjoh ka seiñ ha uni u moomær.

Chooh chooh da ong u wa kawi na ki thong krehkaam ka seiñ toh wow yada ya ka ri wa ka jaitbru na ki baar jylla heiwa da pynkhreh ya kiwa boon ki mat wow dawa na ka sorkar jylla wa ka sorkar pyrdi.

Da ong u wa kawi na ki mat wow dawa toh ka People’s Representation Act 1987, hei wow dawa wa kiwa mihkhmat paidbah toh u man ki ki tre jylla (khlem ki baar jylla) deiwa ong leh wa lada ymye u leh yeini, ha kawi ka sngi daw man Chief Minister da ki baar jylla ki wow pyndam ya ka Land Transfer Act.

Heijooh i por da ong u wa i awri ha khappood jia i nei wym chimkhia ka sorkar yeini, wei da emkaam u pynlait ya i thaw khnang wow skem noh u pood.

U Jason Mairom hawa e i klam da e khublei wei da yaroh u ya ka seiñ kawa da kreh neibynta i bha i miat deiwa kynmoo heipor wa wan ka kjut khlam COVID wa da kyrchaan ko ya ki manyung wa emkaam yarap.

Da kyntu u leh ya kiwa kitkaam wa ki dkhot wa ymtoh u raikot wow myntoi samen tangwa wow kreh leh yei bha i miat ka imlang sahlang.

U Lasky Rymbai da sñiawkmen u wa em kam kani ka seiñ wa e mynsien ya ki paidbah neibhah wa kam u MDC ha JHADC em ki kaam kiwa ymye u wow leh tangwa ki seiñ won da leh ko deiwa kynmoo ya ki por wa em u ha ka KSU ya ki kaam wa da leh ha kitu ki por.

Da yaroh u ya ka seiñ neibhah hanla ym joor i mih pyrthai ko ha ki Social Media tangwa ki kaam klam ki rap joor neibhah emkaam u man kiwa im miat im bha wa i kreh kyllooid mynsien ya ka imlang sahlang.

Kam u kongsan u Kyrmen Shylla da sñiawkmen u wow embynta hei lehkmen dap snem ka seiñ kawa kreh ya i bha i miat ka jylla heiwa oo leh kam uwa mihkhmat em u i mynsien wow kreh ya ka imlang sahlang.

Da e khublei u leh ya kiwa kitkaam ka seiñ kamjooh ki dkhot wa da kynjoh ya kani ka lehkmen dap 15 snem.

Chooh chooh da ong u wa boonsien em i sñiawthooh bakla ki paidbah heiwa emkaam u puræ bñiah ya ki mat ki wow pynim ya ka jaitbru neibhah wa ka sorkar u leh ko yeiwa emkaam wei lada iwa bakla oo leh samen u pyrchah u yeitæ.

Da ong u leh wa ka sorkar e ko boon tylli ki Scheme tangwa ym jooh rap yoh ki paidbah neibhah wym biang ki ya ki kot ki sla kam ka Aadhaar heiwa da kyrpaad u ya ka seiñ wow pynsñiawthooh ya ki paidbah ya kam kini ki kot wa emkaam.

Heijooh i por da ong u wa i wan ki karkhana pynmih khyndaw-bilat cheini toh da ki soskular heiwa emkaam u booddien ya ki kular ki kam i thung kreh, deiwa kyntu ya ka seiñ wow booddien yeini neibhah boon na kini ki karkhana hap ki wow thung kreh ya ki tre chnong kamwa 60%.

Neiliang u Kyrmen da yahkhmat u leh wow pynskem ya kiwa kitkaam wa thymme ka seiñ kiwa kynthup ya kini ha wah:

1. President – U Dapoiwanmi Laloo

2. Vice-President – U Aimonbha Syad

3. General Secretary – U Hamwer Bhoi

4. Asst. Secretary – U Rilangmi-00 Paslein

5. Finance Secretary – U Mainlip Lathong