Ka Voice of the People Party (VPP) chirup wa ki MDC yong ka ynne dang 10:00 waje i step da khang ki ya ka Gate wow psiah cha ka Council wow dawa pynlait noh ya ka tulop kiwa kreh wa da sah la 9 bnai kattu.
Hadien ini i khang tala da wan mih ki pulit ka Jowai Police Station kamjooh u Magistrate ka West Jaiñtia Hills wow yaklam pynbait yeini wei i yaklam da pteiñ i hadooh wa wan ka B. Bamon kawa man ka Secretary ka Legislative Department.
Neiliang ki MDC wa ki heh ka VPP da yieñ skem ki wa kat wym pu poi ka tulop kiwa kreh ka Council ki leh ym sangeh yakhih wei ym wai ki ya ka Gate ka Council.
Neitæ won da wan u EM ka Council uwa man u MDC ka Jowai South, u Moonlight Pariat da ka kari du wow khyrngiat u yoo wa chah khang ka Gate ka Council, heitæ ki MDC ka VPP da phah ki ya oo wow uiñ u wei wym chah ki u psiah ya ka kari, heitæ da mih i yañia hapyrdi ki ar liang wa u Moonlight, uwa dei chrai da booh u ya ka kari ha khmut kani ka Gate.
Katwa dang lai i por kiwa kreh ka Council da wan kreh ki wei da yieñ ki ha sarok wa ha luti lai kjat kat hadooh wa sdang wow chah ya kiwa kreh wow psiah lyngba ka Gate khian.
Hadien kattu katni por da wan u Deputy CEM ka JHADC, u Lasky Rymbai uwa da khana wa hadooh i janmiet dapoi ka poisa wow su ya ka tulop tangwa ki MDC ka VPP da yieñ skem ki wow pynyoo ya ki ñia yong ki deiwa ban wa kat wympu yoh dei thoh næ da ka chithi ymye ki wow randien.
Kamtæ u Lasky leh da lai u cha kamra u wow yang ya ka chithi næ ka kot wow pynsakhiat yeiwa da phah ya ka poisa wei da poi ko ha ka Council (Treasury).
U Lasky da ong u wa i khang ya ka Gate man i wym toh rukom wei ini da pynbor ya ki spah ngut wa wan emkaam wow liwan ki katwa neiliang ki VPP da ban joor ki wa ka tulop wa sah man ko kawa emkaam wow pyndep yei emkaam ki paidbah.
Hadooh wa pynmih ya kani ka khubor i khang ya ka Gate dang pteiñ i.
Discussion about this post