U Mount Everest, toh u loom wa 8,849 metre hei jrong uwa man leh uwa jrong dooh hapoh pyrthai wei em u ha khappood Nepal-China wei man u u loom wa em ha ka thong yong kiwa boon wow ku ya oo. Ya uni u loom da tip leh kam u Sagarmatha ha Nepal wei riñ u ya ki spah ngut ha ka chi snem wow ku ya oo.
Ini i wan ki bru cha uni u loom booh i leh hei maa ya uni u loom khamtam nei jhep wa ieh ki bru.
Iwi i Video wa booh ka Everest Today, da yoo wa jakhlia uni u loom wei da lang u da ki jhep nadooh ki muna, ki yusong baam, ki that, ki Tent wa da ieh khamtam ha Camp IV.
Ha ini i Video ka Everest Today da thoh leh ya ki kyntien yei wym em i bahkhlieh ki bru wow pynneh yei khooid u. Da thoh leh wa ki bru im ki na ka Oxygen namo ka la’ær tangwa u Everest leh da dooh sang-et u. Da kyntu leh ya ki bor sorkar kamjooh ki bru wow em i bahkhlieh hawa wan ku ki ya uni u loom.
Ki bru wa yoo ya kini ki Video wa poor ha Social Media da pynsñiaw ki yei sñiawkhia wei piahnood wow yoo ya ini i jhep. Da em kiwa e buit wow pynkhooid ya oo deiwa pynku ya ka bai ku ya uni u loom wa kiwi.
Ka Nepal da pynmih ko ya ki kyndon ha ki snem wa dadep wa kynthup ya ka Garbage Deposit Scheme wei wow pynbor ya kiwa ku wow pynkhooid namo wow rah biang yei jhep wa pynmih ki kamjooh da em kiwa kyrpaad wow pynkhor noh ya ki kyndon khnang wow yada ya oo.
Discussion about this post