Ka seiñ FKJGP-West Jaiñtia Hills hapoh i yahkhmat u President, u Marhok Marboh ryngkat wa u President ka Nartiang Unit, u Bin Raliang ynne ka sngi da yachem ki ya u Health Minister, u Wailadmiki Shylla.
Ini i yachem toh heiyatoh wa i duna ha ki thaw sumaar nadooh ki Doctor, ki Nurse, kiwa kreh wa ki tiar ki tar kam ha Jowai Civil Hospital Ialong, ka MCH Hospital Jowai, ka Nartiang CHC wa kiwi ki thaw sumaar.
Ka seiñ da e ko leh ya ka dorkhat ha u Wailadmiki deiwa kdaw wa ha Civil Hospital Ialong emkaam ko ya u Doctor Orthopedic, Psychiatrist, Anesthetist, ki Medical and Health Officer, Radiologist, NCD Doctor, Medicine Specialist, Pathologist & Microbiologist wa kiwi ki Doctor.
Chooh chooh da kdaw wa ki Nurse leh dang emkaam bha ha kani ka thaw sumaar nadooh ha Geriatric Ward, Dialysis Department, Emergency Room kamjooh ki Technician ha Laboratory, ECG, OT, ICU, X-RAY wa ki DEO.
Da dawa leh wow pynbiang ya kiwa kreh Grade IV wa ki Sanitary Worker, ki Modular OT, ka Ambulance wa u Driver, Chowkidar wa Security Guard.
Ka seiñ da kdaw ko leh yei duna ha ka MCH Hospital, Jowai nadooh ki Doctor OBS & Gynecologist, Anesthetist, Radiologist, Microbiologist, Physiotherapist wa kiwi.
Da kyrpaad ko leh wow booh sa ya ka Obstetric ICU, Police Booth, Private Ward, ki tiar kam ka MRI Machine wa kiwi.
Hajrong kini waroh neiliang u Wailadmiki da kular u ya ka seiñ wow chimkhia ya ki.
Discussion about this post