Ar ngut ki bru da yap ki wei da mynsoo 48 ngut wa kynthup ya ki pulit deilang ar ngut ki sahep IPS ha i chah kawang moo ha Karbi Anglong nadooh ka 22 tarik heiwa wot u DGP, u Harmeet Singh leh da chah mang u ha Kheroni, West Karbi Anglong District.
U DGP da kyntu u ya ki paidbah wow man kiwa jaijai wei wow krehlang wa ki bor District. Da khana u wa ki bor pulit da chah dat moo, chah siat khnam wa kiwi ki tiar na waroh ar liang hapyrdi i pyrchang yaklam, wei ini da pynbor ya ki pulit wow leh ki yeiwa emkaam.
Da ong u wa da phah chooh ya ki pulit cha ki thaw wa synjor wow pynneh yei chongsuk.
Heijooh i por da ong u wa ki bru wa emkti hei thang yung thang dukan daw thooh ya ki.
Kamwa man da phah 8 Battalion ki pulit wa san Company ki Central Reserve Police Force (CRPF) ha West Karbi Anglong District.
Ka khubor wa da mih da ong u wa uwi na kiwa yap toh uwa em hapoh i dukan wa chah thang wei ma u leh uwa duna hei doh i pran.
Ka sorkar da phah khang ko leh ya ka Internet ha Karbi Anglong wa West Karbi Anglong District kat hadooh wa pynbna da kamwi.
Kam wow pykynmoo wa ini i yakhih da sdang ki deiwa dawa na ka sorkar wow kyrriah ko ya kiwa man kam ki Non-Tribal kiwa pynman thaw sah ha ki thaw wa em hapoh ka Sixth Schedule deiwa ong wa kini ki bru da chong da sah ki ha kini ki thaw pyrchah ya ka aiñ ha ki thaw wa tip kam ki Professional Grazing Reserves wa ki Village Grazing Reserve Lands.
Heiyatoh wa ini da pynman yei chah thngan da ki jaitbru Karbi nadooh ka 6 tarik uni u bnai.
Discussion about this post