Ka Seiñraij Jowai hei pait i pynlai ka Niamtre Committee chirup i yakrehlang wa ka Seiñraij Khonchnong ha ka 27 wa ka 28 tarik u Kmaichonglad da pynman ki ya ka Dorbar Niamtre ki khon ka Ri 12 Dolloi 30 Syiem ha chnong Khonchnong, Elaka Raliang, Laskein Block.
Ha ka sngi nyngkong yong kani ka dorbar da em ki prokram kyrpang wa yatoh wa ka niam ka rukom, ka dustur riti heiwa ki khon ka Niamtre na ki raij ki chnong waphær da wan ki wow ya chimbynta.
Ha ka sngi wabood won yong kani ka Dorbar Niamtre ha Madan Kynroh Arliang hei pynlai u Raymond Nartiang, Chairman NTC-SRJ da yoh i ngoohblai ngoohsyiem na u Kitbhahlang Sumer, Secretary KKC Seiñraij Khonchnong, i pynhær lama da u Hamecheki Papeng, Langdoh Raij Khonchnong katwa u Return Passah, President KKC Seiñraij Khonchnong da e u ki kyntien pdiang burom.
U Kune I Langki Passah, Sangot Raij Khonchnong kam uwi na ki chakri niam ka Raij da e u i khana parom chaphang ka chnong Khonchnong katwa ki waheh wasian kiwa da e i klam i kappæ hajrong ki phang waphær toh u Dr. Mihchwa Tyngkan, Adviser Seinraij Raliang uwa da klam ha ka phang wa ong “Iabang Sneiñ Iabang Kroo ya ka niam ka rukom u nang ye u pynkhroo”, u Rangbah Paia B. Synrem, Asst. General Secretary Sengkhasi Kmie, Mawkhar Shillong da klam u hajrong ka phang wa ong “Ka Niam hapdeng ki jingkylla ba bha” katwa u O.H. Toi, President Seiñraij, Jowai da klam u hajrong ka phang wa ong “Pynsarot yei yong i dahi kam wa da dep kyrkhu ki Blai”.
U O.H. Toi hei klam da ong u wa ka jaitbru Ynñiawtrep Ynñiawskum toh kawa da kyrkhu u Trekirot ha waroh ki liang, ong u leh wa hawa kyruiñ cha kani ka juk, yoo sakhiat wa ka jaitbru em ko hapyrdi ki tynjooh wakhroo ha waroh ki liang wei da boon sadu ki stat pakhlat kiwa kwah u pyndooh pyndam yei man kyrpang ka jaitbru.
Kamtæ kam ki pateiñ kani ka juk wache wastat, kiwa dang bood dang ksoh yei man kyrpang ka jaitbru ymtoh u e laad i ya kam kini ki jaitbru wei ymtoh leh u lailæng laipær næ u yoo kwah yoobang ya ka niam kiwi.
Chooh chooh ha kani ka Dorbar Niamtre da em leh i pynlait paidbah ya ka Almanak 2026 yong ka KKC Seiñraij Jowai da u O.H.Toi, President Seiñraij Jowai chirup wa u Arwotki Sumer, General Secretary wei kyrpang leh i pynkup burom ya ki manyung kiwa da kylladien cha ka Niamtre kamjooh ya ka Nimanchwa Laloo, DFO, Wildlife Division, Jowai neibynta ki kaam wa bha yong ka ya ka Raij Khonchnong.
Ha kani ka dorbar da em leh ki chaad ki rwai sur tynre wa yoophooh yoophieñ wa da chimbynta da ki khon khynroo khyllood wa ki manbei na ki Seinraij waphær wei khaddooh chwa wow poi ka bynta wakut næ i pynhiar ya ka lama da ka men Merry Sumer, kawi na ki manbei wa heh rta ka Seiñraij Khonchnong katwa ka Kheinkor Papeng, Secretary Seinraij Khonchnong da e ko ki kyntien sñiawngooh.
Discussion about this post