Ka dei na ka jingsheptieng haduh ba ki la pynïap noh ïa u Kiang Nangbah

Da: U Khroo L Pariat

Ha kane ka lyngkhuh ba 163 snem ka jingshah pynïap u Kiang Nangbah, u khla ka wait. Nga ai burom ïa ki Kiang Nangbah Ïasiat Khnam Memorial Society, ka Seiñ Raij Jowai, Seiñ Raij Niamtre Shillong, ka KSU seng kmie bad ïa kiwei de ki shnong, ki seng kiba ïaleh shitom ban pynkynmaw ban kyrsiew ïa ngi man la u snem ïa ka nongrim bad ïa ka dawbah ba shah pynïap u Khla ka Wait ka jaitbynriew hynñriewtrep.

“Para ri, ialeh tyngeh ban im ka jaitbynriew hynñriewtrep, ka ri India jong ngi”.

Ka jingtipbriew, ka jingtip Blei u Kiang Nangbah bad ka jingïaleh ka jong u ïa ka hok kaba pyntieng pynsmiej ïa ki phareng bad ïa ki nongïarap ki jong ki haduh ba ka la pynduh noh ïa ka jingsngew para briew ha ki phareng. Kane ka jingsngewsyier sngewtieng ka don ruh ha ki spah ngut ki nongbud kaba la pynïap noh ïa ka jingtipbriew, tip Blei bad ka hok longbriew manbriew ka la jngai noh.

Kumta, dei ka jingtieng kaba pynphalang ha ka jingsngew ki phareng bad ïa ki paidbah ruh kumjuh. Te, tang da u tyllai ki phasi pynïap noh ïa u Kiang Nangbah hakhmat ka jingïambriew ka jingsakhi ki spah ngut ki paidbah.

Haoid, ka met u Kiang Nangbah ka la ïap. Hynrei ka mynsien bad ka nongrim u Kiang ka im ka ud sah haduh mynta mynne.

Related posts

I mynsien chlur, i rai samen U Woh Kiang Nangbah

December 30, 2025

Khlawait Wa Khroo Ka Ri

December 30, 2025

Tangba, imat kata ka jingsngewtieng sngewsyirer ka dang neh sah haduh mynta mynne ha ka pyrkhat ka jong phi bad ha kiba bun ki trai ri trai muluk ki pateng ba mynta ka ri?

Ka jingkyrpad ïa phi baroh ki para ri kiba dang don ka jingsngew ïa ka jinglong trai ri, trai muluk, ba kynmaw ngi don la ka kamram kumba la thaw ïa ka longbriew manbriew ha ngi ha kine ki lum ki pdeng jong kane ka pyrthei kaba heh kaba ïar. Te, sngewbha ïaleh ban pynduh noh ïa kata ka jingsngewsyier sngewtieng, kaba pyntlot noh ïa ka longbriew. Da kaba lah ban pynbeit noh ïa la ka pyrkhat, ka jingkhlaiñ kan pynshlur ban kren ïa ka jingshisha bad leh ïa kaba dei, ka hok kan kyrkhu biang ïa ka jingim ban biang ban dap bad ka lawei kan long kaba shngaiñ ynda la heh la san nangne. Ka pateng khun pateng pyrsa ruh kin pdiang da ka jingniewkor ïa ka jingkynshew bad ki jingbuh jingdon ka jong phi baroh.

U mynder ri ruh uba la khreh ban knieh jyndat napoh napoh ïa ka jaitbynriew hynñriewtrep, un ym lah shuh ban teh mraw ïa ka pyrkhat pyrdaiñ ka jong ngi, la ha ka khih ka kamai, ka jingstad ka jingtip. Ngin dang khlaiñ ha la ka jingtip jingstad lajong ha ryngkat ka spah mariang ka ri ka pateng jong ka jaitbynriew kan im kan phuh kan pheiñ ha kine ki lum ki wah kiba la kyrkhu u Blei ïa ngi.