Hadien i lai luti ka Dorbar Ki Waheh Kur Ri Jaiñtia neipor cheipor wow dawa na ka Jaiñtia Hills Autonomous District Council (JHADC) wow tipmit noh ya ki jait kur waphær waphær wa haap hapoh u pood u ang yong yong ka khamtam ya ki kur kiwa dadep pynpoi yei pyrtuid cha ka JHADC, kamtæ ynne ka sngi ka Dorbar Ki Waheh Kur Ri Jaiñtia lyngba kiwa yahkhmat yong ka wa kynthup ya u K.L. Pariat, President, u G. Bareh, General Secretary wa u Pyrkhat Shylla, Vice President da lai e ki dei thoh pynkynmoo biang ki ha u CEM ka JHADC wa toh u tipmit smat noh khnang yow lait nei maa wa ye u wan lada slem u tipmit.
Yeini i dawa a Dorbar Ki Waheh Kur Ri Jaiñtia da booh por ko ya ka JHADC wa toh u tipmit hapoh ka 31 tarik uni u bnai.
Hawa klam cha kiwa thoh khubor, kini kiwa yahkhmat da pynkynmoo haroh ki yei kular u CEM wow tipmit noh da ka aiñ ya ki kur wa e jait Bei kamjooh ya ki Seiñ Kur wa kiwa yahkhmat ki Seiñ Kur.
Ong ki i daw wym tipmit wei pynskem da ka aiñ ya ki jait kur katkam ka 6th Schedule kamwa da e bor da ka riti krehkaam ka ri lyngba ka JHADC, booh ko hei wym chngaaiñ ya ki kur wa chim jait na ka bei wa ka mynried yong ka jaitbru.
Kamtæ yooluti ki wa ha kani ka sien khaddooh wa kyrpaad ki, ka Executive Committee ka JHADC hapoh i yahkhmat u CEM u pynmih smat noh ki ka hukum hapoh ka 31 tarik uni u bnai, neibhah wym em kwah ki u chim da kawi won ka luti wow pynbor ya ka JHADC wow tipmit ko ya ki jait kur waphær waphær wa haap hapoh u pood u ang yong ka.
Discussion about this post