Kam chibynta i pteiñ wow pynku ya ki kaam yalehke ha ki chnong ki thaw, ynne da wai sa kawi ka madan Futsal wa thymme ha chnong Latyrke, East Jaiñtia Hills District kawa da chna hapoh ka District Mineral Foundation (DMF) Scheme yong u snem mang tangka 2025-2026, wei da wan wow wai da ka MLA ka Sutnga-Saipung, ka Santa Mary Shylla deiwa emlang u Deputy Commissioner, East Jaiñtia Hills District, u Shivansh Awasthi, u Block Development Officer (BDO) ka Saipung C&RD Block, u Dr. R. Pyrtuh deilang ki waheh chnong ka thaaiñ.
Ka MLA hawa e yei klam da ong ko wa i dawa wow booh madan Futsal ha chnong Latyrke toh iwa da sahteiñ nadooh u 2024 wei da sñiawkmen ko wa da mankaam ini.
Da ong ko leh wa kani ka thaw wa em ka madan Futsal toh iwa heh haddooh 12,000 sqft iwa pynman ya kani ka madan kam kawi na ki madan Futsal wa heh dooh ha East Jaiñtia Hills District neibhah kiwi da chna hei heh wa 10,000 sqft.
Da pynche ko leh wa i daw wa pynheh ya kani ka madan toh yow ye u chibynta rap boon ngut ki bru.
Da kyntu ko ya kiwa chong chnong wow sumaar ya kani ka madan deiwa pynchlur leh nadooh kiwa dang khynnah hadooh kiwa da heh rta wow pynemkaam ya ka madan khamtam heipor janmiet yow yoh yei chait i khiah.
U DC da pyntp u wa kani ka madan Futsal ha Latyrke toh kawa 11 hapoh ka District wei da chna da kawa rap heh hadien wa da ap da sñiaw na kiwa pynemkaam ya ki madan wa dadep wai.
Discussion about this post