Ynne ka sngi da pynman ya ar tylli ki yalehke kam chibynta yong ka lympung 4th T20 Cricket Knock-Out Tournament wa da pynlai da ka Sports Social and Cultural Club, Ummulong, West Jaiñtia Hills.
Ha ka yalehke wa nyngkong, ka Wahiajer CC da jop ko ya ka Eastern Warriors CC da 243 Run. Ya ka kylla-khlem da jop da ka Wahiajer CC yeiwa da jied ko wow Bat nyngkong heiwa da ye ko u kamai 258/4 na ki 20 Over. Uwa kamai Run boon dooh toh u George Ryngkhlem uwa da yoh 107 Run wa u Heimon Dkhar 52 Run. Neiliang kiwa kawang bol ka Eastern Warriors, u Sony Nongtdu da yoh u 2 Wicket.
Hawa kdong yaka thong, ka Eastern Warriors dapoi ko du 15 Run deiwa haap lut ki Wicket waroh,katwa na kiwa kawang bol ka Wahiajer, u George Ryngkhlem wa u Wanjop Suja da yoh ki mar 3 Wicket.
Yei naam Man of the Match ha kani ka yalehke da rah da u George Ryngkhlem.
Ha ka yalehke wa ar, ka Eastside Inn CC da jop ko yaka Nartiang CC da 95 Run.
Ya ka kylla-khlem da jop da ka Eastside Inn wei da jied ko wow Bat nyngkong heiwa da ye ko u kamai 161/9 na ki 20 Over. Uwa kamai Run boon dooh toh u Bok Thabah (41 Run) wa u Welmanson Pasaah (27 Run).
Neiliang kiwa kawang bol ka Nartiang, u Den Myria da yoh u 5 Wicket.
Hawa kdong yaka thong, ka Nartiang da poi ko du 66 Run deiwa haap lut ki Wicket ko waroh na ki 15.5 Over, heiwa uwa kamai Run boon dooh toh u Rakesh Raliang uwa da yoh 15 Run, katwa na kiwa kawang bol ka Eastside Inn, u Welmanson Pasaah da yoh u 3 Wicket, neitæ u Kenny Wann wa u Smarth R Marak da yoh ki mar 2 Wicket.
Yei naam Man of the Match ha kani ka yalehke da yoh u Bok Thabah.
Ka yalehke mynstep ka sngi u man ko hapyrdi ka Nangiaikiew CC pyrchah yaka Poh Hali Jowai CC heipor 9:00 waje i step, ka yalehke wa ar won hapyrdi ka Seiñraij Niamtre Ummulong CC wa ka Iong I CC heipor 12:30 i sngi.
Discussion about this post