Ka lympung yalehbol wa tip kam ka 1st 7-A-Side Football Men’s Niamtre Cup 2026 kawa pynlai da ka Seiñraij Niamtre, Ummulong Sports and Games Committee da sdang ko ynnin ka 31-01-26 ha Nawwania Futsal Ground, Ummulong.
Ha ka sngi sdang da em ka yalehke hapyrdi ka Seiñraij Mukhla pyrchah ya ka Khliehtyrchi Pohsiej wei ka yalehke wa ar won da pynman hapyrdi ka Seiñraij Nartiang pyrchah ya ka Seiñraij Ummulong.
Da wan wai ya kani ka lympung da u Widerlan Pale uwa man u Assistant General Secretary ka chnong Wahiajer kam u kongsan hei emlang u Damechwapaya Dhar, President NPYF 1-Nartiang Constituency kam u symbood kongsan deilang wa ki dkhot EC ka chnong, ki dkhot ka Ummulong Sport Club, ki waheh wasian yong ka chnong wa kiwi tawon ki marjan chnong kiwa wan sakhilang.
Ha ka yalehke wa nyngkong hapyrdi ka Seiñraijj Mukhla pyrchah ya ka Seiñraij Khliehtyrchi Pohsiej da yoh ki u thap mar chi kool, kamtæ ka yalehke da poi ko chei yachut Tie-Breaker heiwa ka Seiñraij Mukhla da jop ko da 3-2. Yei naam Man of the Match da yoh da u Kaisa Suna (Seiñraij Mukhla).
Ha ka yalehke kawa ar hapyrdi ka Seiñraij Nartiang pyrchah ya ka Seiñraij Ummulong, ka Seiñraij Nartiang da jop ko da 9-0 wei yei naam Man of the Match da yoh da u Shemphang Phalangki (Seiñraij Nartiang).
Ki yalehke wa bood u man ki ha kani ka 3 tarik hapyrdi ka Ehdaw FC pyrchah ya ka Passah Brother heipor 2:30 i sngi wei daw pynbood da ka Seiñraij Wahiajer pyrchah ya ka ML04DSTL FC heipor 3:30.
Discussion about this post