Yow pynneh pynsah ya iwa rap phær hapoh ka chnong Bataw, daw pynman da ka Umsyngki Festival

Kam chibynta wow yada wei pynbha pynmiat ya ka bei ramaw, neiliang kawi na ki Club wa da seiñ da ki longchwa manchwa kawa tip kam ka Bataw Rumshnong Youth Club (BRYC) hapoh chnong Bataw nadooh u snem 1967, da chim ko ya ka laad ka luti wow pynman ya ka tamasa lehkmen kawa tip kam ka 1st Umsyngki Festival 2026 kawa daw pynman ha ka 12 wa 13 tarik uni u February 2026 ha madan Lai-Phew Krem Playground Bataw.

Ya kani ka Festival da pynman hajrong ka phang wa ong: “To enhance the beauty of nature” iwa mut wow nangpynbha chooh chooh yei miat yei yoosuk ka bei ramaw.

U President yong kani ka Club uwa man leh u waheh chnong yong ka chnong Bataw, u Deihok Sumer da ong u wa da e pyrtuid ya kani ka lympung hei pyrtiud ka nan wa em hapoh chnong Bataw kawa man ka nan wa ya chimbynta ki khon ka chnong kam ka rong chisien chisnem wow ya tong ya ki dakha dathli khamtam ya u ‘Syngki’ uwa boon bha ha kani ka nan.

Harood kani ka nan em leh kawi ka krem kawa tip kam ka Krem Umsyngki kawa taan ya ka um wa dap chlai ha kani ka thaw ha ki por liyur wa joor slap.

Kani ka nan man ko leh kawa kyrpang bha kawa dap um bait wei manda da toh i por wow taan ka krem ya ka um, taan ko hadooh 3 sngi khlem sangeh hadooh wa khian kani ka um. Soodong kani ka nan em leh ki khloo wa yoosuk bha deilang ki phlang wa yirngam kiwa pynmiat dur ya kani ka nan.

Kattæ won kat dang lai ki por ki sngi, kini waroh da sdang ki u dooh u dam kamtæ da chim rai wow pynman ya kani ka Festival ka wow man leh ka wyrta wow khang yei noh jhep cha ki wah wa kai um cha ka nan Umsyngki neibhah daw man ko i dooh nong wa khroo lada dooh yeiwa yoosuk ka nan Umsyngki.

Man ko leh kammon u thooh laad u pynman ya kani ka thaw kam kawi na ki Tourist Spot yow taan ya kiwa uiñke suwari kiwa najan kamjooh najngai.

Related posts

Rs. 11 lak ka Bumper Housie ha Ummulong ka wow sdang heipor 9:00 waje i miet

February 2, 2026

Ka Result Lucky Draw ka Dorbar Chnong Tuber Kmaishnong

February 1, 2026

Ha kini ki ar sngi ar miet daw em ki pynwyrngia wa boon jait kamwa da kdaw hei dur kiwa daw chimbynta da ki khon khynroo khyllood ka chnong Bataw kamjoh napoh ka Ri-loom Jaiñtia hadooh ka yakob miat kynthai wa tip kam ka Miss Umsyngki 2026 wa kiwi kiwi de.

Kamtæ da khut sñiawbha ya phi ki khon yong ka chnong Bataw, ki para marjan chnong, ki lok ki jor kiwa najan wa najngai wow ya wan sakhilang phi ya kani ka Festival kawa khlem chim kawon kawon ka bai psiah (Entry Fee) khnang wa i thmu u man ko iwa jop.