Ka sorkar jylla da phah ko wow pynman ya ka takit wa bniah hajrong i yap kiwa kreh mylla ha ka krem tih mooyong pyrchah aiñ hadien wa tympdung Dynamite ha kawi ka paar mooyong wa em ha Mynsngat ka thaaiñ Thangskoo, East Jaiñtia Hills District.
U Montri Rangbah ka jylla, u Conrad K Sangma da pynsñiaw u yei sñiawsih hajrong ini wa jia, heiwa da ong u wa i bahkhlieh u pynkit bait ha kitu kiwa emkti wei daw pynchitom ki deiwa eh katkam ka aiñ. Da ong u wa da phah ya ki pulit wow leh deiwa khor ya kitu kiwa emkti ha ini wa jia.
Katkam wa khana u Conrad, ini da jia i heipor 11:00 waje i step wei hadooh kattæ da chem ya 18 tylli ki metyap na katai ka thaw wei dapoi ki bru ka SDRF wa NDRF kiwa da em ha katai ka thaw wa kynthup ya u IG ka Eastern Range.
Da ong u wa ini i thaw wa jia toh iwa jngai kamwa 25 Km na Khliehriat, tangwa da chimpor hadooh 3 kynta wow poi neibhah wa man i thaw wa em cha kdong bha wei lait du ki ki kari 4×4.
Da pyntip u leh wa neiliang ka sorkar u phah ko ya ar ngut ki Montri sorkar kitæ u Wailadmiki Shylla wa u Lahkmen Rymbui yow lai cha katai ka thaw wa jia yow bichaar yei kaam deiwa ya krehlang wa ki bor District.
Ha iwi won i liang da ong u wa kattæ da sdang ya ka Scientific Mining wei da yooluti wa waroh kiwa tih mooyong wow leh ki yeini katkam ki kyndon yow yoh bor wei ymtoh de wow tih mooyong ki pyrchah ya ka aiñ.
Discussion about this post