Hadooh wa hap pynsangeh ya ka dorbar hadien wa chit i kylliang ktien u Conrad wa u Ardent hajrong ka ILP

Ka Yung Dorbar Chna Aiñ ka Meghalaya ynne da sakhi ko yei yania wa joor bha deiwa ya kbai wei sngoh miej hawa yaklam hajrong ka phang Inner Line Permit (ILP), heiwa u Chief Minister, u Conrad K Sangma da khyrwit u ya u Leader of Opposition, u Dr. Mukul Sangma wa u MLA ka VPP, u Ardent Basaiawmoit.

Ini man ko kam chibynta wow jubab yeiwa kylli u MLA ka Sohiong, u Synsharkupar Roy Lyngdoh Thabah, heiwa u Chief Minister da jubab u wa neiliang ka sorkar jylla da yaklam ko wa ka sorkar India wei da pait ko leh sa kawi ka laad lyngba ka aiñ Immigration and Foreigners Act, 2025, wow wanrah ki kyndon wow sariem kam ka ILP.

Da ong u wa kani ka aiñ toh neibynta kiwa na baar ri wa emkaam ki wow yoh bor chwa wow psiah chapoh ka jylla. Da kdaw u wa ha u December 2025 da pynmih yei pynbna wa ka Arunachal Pradesh, Manipur, Mizoram, Nagaland wa Sikkim wow man ki kam ki Protected Areas wei ka Meghalaya leh dang thooh laad ko wow yoh yeini i jooh.

Neiliang u Dr. Mukul da kylli u wa lada ka sorkar ym em de mo yaleh ko wow pynyoh ILP wei da kylli u leh wa ileh wym em pynkrehkaam ya ka Meghalaya Residents Safety and Security Act (MRSSA), 2016 deiwa toh rukom. U Chief Minister da jubab u wa iwa eh toh wow booh ya ki Entry wa Exit Point wei ya kini ym em da thoh hapoh ka aiñ.

Manda yieñ u Ardent wow kylli lada ka sorkar leh kyndeh ko yeiwa sñiaw ki paidbah wei dawa u wow jubab lada chimkhia sakhiat ka sorkar wow pynyoh ILP. U Conrad da yieñ u wow jubab wa ka sorkar kamjooh neiliang yong oo samen da thoh ki cha u Home Minister najrong wa yachem wa oo da boon sien wot wow yachem wa u Prime Minister heiwa da kylli u na u Ardent katwon sien da thoh da lai yachem u wa u Home Minister wei heini da mih i awri ya kbai wei choh miej heiwa u Ardent da ong u wa oo toh du kam u MLA wei ym em yohlaad u wow lai yachem.

Hadien i ya kylliang ktien wa chit bha, da yieñ leh u Deputy Chief Minister wow yania lang, heiwa neiliang u Speaker da hap pynsaneh u ya ka yung dorbar 10 minit.

Manda pynman biang ya ka dorbar, da e laad biang ya u Conrad wow jubab u heiwa da ong u w aka sorkar da chimkhia ko deiwa da thoh da boonsien cha ka sorkar pyrdi deiwa yachem wa ki wei da kyntu u leh ya u Ardent wow lai u cha Delhi neibhah wot da ki seiñbhalang leh da lai ki cha Delhi neibynta ini wei kam ka sorkar leh ym em sangeh ko neibhah wa chimkhia ko deiwa tooh kiwi laad kamjooh ka ILP.

U Ardent won da kylli won u katwon sien da khut ka sorkar ya ki wow yaklam yow ya krehlang hadooh wow lai cha Delhi.

Related posts

Pynlait ka Seiñ Kur Sana ya ki Ticket Luck Draw, da khut leh ya kiwa kwah u thied ya ki Stall ka Fete

February 18, 2026

Dawa u Paul Lyngdoh wow pynman ya ka thaaiñ sor Shillong kam ka District

February 18, 2026

U Conrad da ong u wa waroh hap leh jar jiar i kaam wot dei yong samen kamjooh leh lada yoh laad wow ya krehlang.

Hadien ini da yieñ sa u MLA ka North Shillong, u Adelbert Nongrum wow ong wa da chah ma chah pynbiej ha ka sorkar jylla wa ka sorkar pyrdi, wei da toh u sangeh noh wow pynbiej ya ki paidbah.

Da yieñ wow jubab da u Deputy Chief Minister, u Prestone Tynsong uwa da kylli na oo wow wanrah ki sabut wow pynyoo wa pynbiej paidbah ka sorkar. U Conrad leh da yieñ u wow ong uwa pynbiej ya ki paidbah toh u Adelbert deiwa kylli ya oo katwon sien da lai u yachem u wa u Home Minister wei heini leh da heh yaaw biang ka yatai hadooh wa hap pynsangeh u Speaker ya ka kynta kylli wei e jubab.