Kawa yalehbol ka Meghalaya, ka Sanfida Nongrum da man ko kawi na ki 26 ngut kiwa da chah jied wow chimbynta ha ka AFC Women’s Asian Cup 2026 kawa daw pynman ha Australia ha u bnai wow wan.
Ka Sanfida da man ko kam kawa yalehbol ka Team India kawa da lai cha Turkey ha u January yow chimbynta ha ki yalehke Friendly Match wa kiwa boon ki Club chwa wow lai cha Australia la 10 sngi wei da man ko leh kawa nyngkong ka kynthai na Meghalaya wow yalehke ha ka Senior National Team ka India wei man ko kawa dang 20 snem i rta.
Ka India da booh ka hapoh ka Group C wei daw yachem ki wa ka Vietnam ha ka 4 tarik u March ha Perth Rectangular Stadium heipor 4:30 i janmiet wei ha kani ka jooh ka Stadium daw yachem won wa ka Japan ha ka 7 tarik u March heijooh hi i por.
Daw yachem khaddooh ki wa ka Chinese Taipei (Taiwan) ha ka 10 tarik u March ha Western Sydney Stadium heipor 2:30 i sngi.
Ki liang wa jop ya ka Quarter Final daw yoh ki wow chimbytnta ha ka FIFA Women’s World Cup 2027 kawa daw pynman ha Brazil. Katwa kiwa rem ha ka Quarter Final daw yakhun ki neibynta ki ar tylli ki thaw kiwa da booh bhah neibynta ka AFC yow psiah World Cup. Ki ar liang won kiwa rem daw yoh laad ki sa chisien wow lai cha Brazil deiwa chibynta ha ka Playoff Tournament.
Ka Sanfida toh kawa jooh chimbynta ha ka Indian Women’s League, kattæ yalehke ko wa ka Garhwal United wei da jooh yalehke ko leh wa ka Bangalore United, Sports Odisha, Sirvodem SC wa ka Meghalaya Sub-Junior Girls’ Team nachwa. Deiwa yalehke wa ka Garhwal da yoh ko leh wow mihkhmat ya ka Delhi ha ka Senior Women’s National Football Championship.
Ha Meghalaya, ka Sanfida da yarap ko wow pynjop ya ka Laitkor ha ka Women’s Football League 2024. Ynnin u snem won hawa yalehke ya ka Misaka United, da yoh ko yei naam Top Scorer wa Player of the Tournament ha ka Karnataka Women’s League 2025-26.
India squad:
Goalkeepers: Panthoi Chanu Elangbam, Shreya Hooda, Sowmiya Narayanasamy
Defenders: Astam Oraon, Juli Kishan, Martina Thokchom, Nirmala Devi Phanjoubam, Sanju Yadav, Sarita Yumnam, Shilky Devi Hemam, Sushmita Lepcha, Sweety Devi Ngangbam
Midfielders: Anju Tamang, Aveka Singh, Babina Devi Lisham, Jasoda Munda, Sanfida Nongrum, Sangita Basfore
Forwards: Grace Dangmei, Kaviya Pakkirisamy, Lynda Kom Serto, Malavika P, Manisha Kalyan, Pyari Xaxa, Rimpa Haldar, Soumya Guguloth
Support staff: Amelia Valverde (head coach), Crispin Chettri (assistant coach), Priya PV (assistant coach), Eli Ávila (goalkeeping coach), Mario Aguiar (goalkeeping coach), José Sánchez (strength & conditioning coach)
Discussion about this post