Ka MAI PATH LAB kawa man ka thaw wow leh Test ya kiwa boonjait ki kjut kawa em ha Khliehriat, East Jaiñtia Hills District deiwa psiah na ka khilon ka Wika Guest House & Restaurant pyn harood u sarok National Highway, da wai paidbah ka haka 21 tarik uni u bnai da u Kyrmen Shylla, MLA ka thaaiñ katwa u Fr. Devasia Vazhayil da e u i duwai kyrkhu kyrdoh.
Ha kani ka sngi wai ya kani ka Lab da emlang u Manish Kumar, DC ka East Jaiñtia Hills, u S. Pasleiñ Addl. SP ka East Jaiñtia Hills, u Justine Dkhar kam u waheh chnong ka Khliehriat West uwa jooh man leh u MLA warim ka thaaiñ, neitæ ki Phadar ki Sister najrong kiwi ki waheh wasian wa kiwa chah khut sñiawbha.
U Dr. Chiborki Pala MBBS, MD (Pathology), kam u tre wa pait pynlai ya kani ka Lab, khana u wa i poi pyrkhat yong oo u sdang kam kani ka Lab ha kani ka thaaiñ toh yow pynjan ki laad yarap cha ki paidbah lait ki u lai chadooh cha jngai iwa daw yarap leh u pynduna yei lut por kamjooh i lut poisa. Pyntip u wa i rukom leh Test ha kani ka Lab da man katkam ka juk katni wa da biang lut ki kor ki bor, wei ye u yoh ya ki Report heipor wa smat lyngba ki WhatsApp, E-mail lane deiwa wan thooh na kani ka thaw.
Ki jait Test wa ye u yoh kynthup nadooh yong ka Clinical Pathology, Biochemistry, Immunology, Hemothology, Tumor Marker, Cytopathology iwa cha i cheini jooh ong i ki Test Liver, Kidney, Thyroid, Test chini, blooh wa kiwi, najrong wa ye leh u Test yei kjut Cancer.
U Kyrmen Shylla hawa klam kam u kongsan yaroh u ya u Dr. Chiborki wa sdang u da kam kani ka Lab wa nyngkong ha ka District heiwa ong u daw yarap bha ko ya ki bru ka thaaiñ wow lai phah Test wei chem yei kjut heipor wa biang, neibhah kam ki bru hi boonsien hei boohteiñ tæ poi chei heh i kjut.
Deiwa pynkynmoo u leh yei khlaad syndet u Dr. Ricky Syngkon khlem tip yei daw wa dang hapyrdi i yoo chait yoo khlan i rukom man u.
Kyrmen u wa kani ka Lab u e ko i maya i chaniah cha ki paidbah ka thaaiñ, wei ki paidbah leh u chim kabu ki ka neibhah bar u lai ki chadooh Shillong heini da duna i lut por ki kamjooh ka bai lai bai wan.
Kiwi won wa e i klam pyn-eh-daw pyn-eh-nasib ya kani ka Lab deiwa yooluti u man i kyrkhu ya ki paidbah ka thaaiñ, kynthup ki ya u DC, u Addl. SP wa u Justine Dkhar.
Discussion about this post