Ka Single Member Committee da wanrah ko ya ka 36th Interim Report heiyatoh wa ki kaam tih mooyong pyrchah aiñ katkam wa da pynkupbor da ka Meghalaya High Court.
Ha kani ka Report da klam leh yeiwa da jia ha ka krem mooyong wa em ha Mynsngat-Thangksoo ha ka 05-02-26.
Da pyntip wa hawa lai cha kani ka thaw wa jia, da yoo ya kiwa boon ki thaw tih mooyong pyrchah aiñ ha chnong Moopala wa Sakhain najrong wa da yoo leh ya u mooyong wa pynhaap harood sarok, ki Crane, ki Tractor, ki Generator wa khlanbor wa kiwi kiwi de chirup leh ki yung trep wa sah kiwa kreh mylla.
Da pyntip leh wa kini kiwa kreh mar ya yoo ki yei wan ki bor District da yut ki na kini ki thaw tangwa ki wym em yut da khana ki cha ka Committee wa kiwa boon toh kiwa na Assam wei da kreh ki ha kani ka thaw da palat 15 snem.
Da khana ki leh na kani ka thaw ym duna ya kawi ka Truck chi sngi kawa kit ya uni u mooyong wa da tih pyrchah ya ka aiñ wei ym em chah ksoh næ chah pynthut ki.
Kamtæ ka Committee da ong ko wa ini pynyoo ko wa dang pteiñ i tih mooyong pyrchah aiñ hanla da khang ka NGT nadooh u snem 2014 neitæ ki hukum wa da pynmih da ka Supreme Court hadien won, wei da chem leh wa ki bor District ym em chimkhia ki wow pynsangeh ya kini ki kaam pyrchah aiñ.
Da ong leh wa i Mynsngat-Thangskoo toh iwa jngai du 10-12 Km na Khliehriat wei ym em leh booh ki Check Point kamwa dep yaklam yow chem ya u mooyong wa tih pyrchah aiñ wei lada leh yeiwa dadep phah ka Committee ym jia hi iwa jia ha Mynsngat-Thangskoo.
Ka Committee da kyntait ko leh yei e daw ki bor District wa ka bynta nadooh Moopala chadooh iwa jia ha Mynsngat-Thangksoo toh iwa chitom bha wow poi thaw wei da kylli leh yei daw wym em leh da ka Drone Survey. Wei iwa jia pynyoo wa yang ki bor District hadooh mynnu wow em iwa jia.
Da kdaw leh yei chem chiboon ki Detonators na yaaw Cement kawa dang haap hapoh ka Umpleng Police Out Post iwa pynman ya kani ka thaaiñ waroh kawi wow em hei maa neiwa jia biang kamwa jia ha Mynsngat-Thangskoo.
Discussion about this post