Ka The Legend (Lissi Pearl) da jop suk ko da 93 Run ya ka War Jaintia United ha ka yalehke ynne ka sngi yong ka District Cricket League 2026 wa pynlai da ka West Jaiñtia Hills District Cricket Association.
Ya ka kylla-khlem da jop da ka War Jaintia United kawa da jied wow kawang bol nyngkong. Ka The Legend (Lissi Pearl) hawa Bat nyngkong da kamai ko 176 Run deiwa haap lut waroh ki Wicket ha ki 30.4 Over. Na kiwa Bat da em ar ngut kiwa yoh nod wa 3 ngut kiwa yoh ar dak. U Dachange Mi Phawa da lehbha u ynne deiwa kamai 85 Run na ki 88 bol wa kynthup ya 13 tylli ki 4 Run. U Conard Sana (C) won da kamai u 25 Run na ki 36 bol wa kynthup ya 4 tylli ki 4 Run.
Na kiwa kawang bol ka War Jaintia United, u Wanso B wa u Phrang Khyriem da yoh ki u pynhaap mar 3 Wicket samen.
Hawa beh ya ka thong, ka War Jaintia United da duna ko da 94 Run deiwa kamai du 83 Run wei da haap lut waroh ki Wicket ha ki 22.2 Over. Na kiwa Bat da em 3 ngut kiwa yoh nod wei du uwi donhi wa kamai ar dak, utæ u Kampher Pohlong (C&Wk) uwa kamai 15 Run na ki 24 bol wa kynthup ya 3 tylli ki 4 run.
Na kiwa kawang bol ka The Legend (Lissi Pearl), u Conard Sana (C), da lehbha u deiwa yoh pynhaap 6 Wicket na ki 5.2 Over, katwa u Rae Sari won da yoh u pynhaap 3 Wicket na ki 7 Over.
Yei naam Man of the Match da yoh rah da u Conard Sana (C) uwa yalehke ka The Legend (Lissi Pearl) uwa lehbha deiwa Bat wei kawang bol.
Ka yalehke mynstep ka 3 tarik toh hapyrdi ka Khliehtyrchi SC pyrchah ya ka Lion Y&SA CC heipor 9:00 waje i step. Ya ka Digital Live Score yong kani ka League ye phi u pait ha https://cricheroes.com/tournament/1881561/wjhdca-district-cricket-league-2026/matches/live-matches.
Discussion about this post