U Deputy Chief Minister ka sorkar jylla, u Prestone Tynsong, ha ka 2 tarik uni u bnai da lai sakhi u yaka lehkmen Chaad Rongkusi ha chnong Amkoi kawa haap hapoh ka Amlarem Sub-Division, West Jaiñtia Hills District, ya kawa da pynman da ka Dorbar Chnong Amkoi kam chibynta u pynneh pynsah yaka riti dustur wa da jooh sikai ki warim haka thaiñ War Jaiñtia neibynta u e ngooh ya u tre wa booh wa thoo hajrong ki kaam wa bha wa da theh u.
Ha kani ka lehkmen Chaad Rongkusi kiwa chimbynta da pynyoo ki nadooh i riam i chaad tynre, i rwai, i lehniam wa kiwi kiwa man i bynta wow tipmit yaka dustur riti.
Ha kani ka sngi najrong u Deputy Chief Minister, u Prestone Tynsong, uwa da man kam u kongsan, da emlang u Lahkmen Rymbui, Montri ka chnat Puræ Puthi uwa man leh u MLA ka thaaiñ, u Stephanson Mukhim, MLA warim ka thaaiñ, ka Vevotolu Kezo, SDO (Civil), Amlarem, u Hopefull Bamon, MLA warim ka Saipung Constituency, u T.R. Suchen, kiwa yahkhmat chong Amkoi nadooh u waheh chnong u Aibor Lamin, ki paidbah wa kiwi.
U waheh chnong ka Amkoi hawa klam da e khublei u yaka sorkar wei pynsñiaw u leh yei roi i paar wa emkaam ka chnong nadooh ki luti syngkieñ, ka yung skur wa thymme ka Government LP School, ka madanbol wa kiwi de.
Neiliang u Deputy Chief Minister hawa klam da yaroh u yaka chnong Amkoi wa yaleh ko u pynneh pynsah ya kani ka dustur riti haka thaaiñ, deiwa kyntu leh yaki u yaleh wow pynman khlieh u snem.
Wei hawa chimkhia yaka dorkhat wa da e kti ka dorbar chnong ha oo, ong u wa oo pathan man u uwa smat u mang poisa neibynta u chna ya u sarok na Amkoi cha Shnongpdeng lada bien ki tre thaw u e thaw, neibhah wa oo sñiawthooh u yei emkaam u pynlait liang ya ki luti syngkieñ ha kani ka thaaiñ neibynta i myntoi ki paidbah khamtam wa man ka thaw wa bna naam hei kam uiñke suwari.
Kamtæ kyntu joor u yaki bor chnong kamjooh ki paidbah wa em thaw wow sñiawbha ki u yakrehlang dei wow e thaw neibynta u chna sarok. Neibhah deiwa e ki, i myntoi u wan ki liang wa nang ym du yaka pateiñ katni tangwa ya ki pateiñ hadien kamjooh.
Da kyntu haroh u yaki manbei manpa u pynchlur ki yaki khon ki kti wow lai skur, u puræ puthi, ym du neibynta u yoh kreh sorkar tangwa yow ye ki leh u chim ya kiwa boon ki laad ki kabu yoh khih wa da wanrah ka sorkar neibynta u yieñ ki hei yong ki hi i kjat.
U Montri ka chnat Puræ Puthi won, u Lahkmen Rymbui hawa klam khut kyntu u wow em i mynsien yatylli, ya maap kylliang, wei wow em leh i mynsiem kitkhlieh neibhah kini man ki luti yong i lai chakhmat ha kiwon kiwon ki kaam. Deiwa kyntu leh ya kiwa chong chnong ka Amkoi u em ya kani ka jooh ka mynsien khnang yow ye u pynmankaam ya i roi i paar.
Hawa kyruiñ u heiliang i emkaam u chna skur, ong u em ki thaw wa da lai chakhmat neibynta u chna yaki skur haka jylla, tangwa i yoh thaw dang man iwa eh bha yow ye u pynlai bait yaki kreh.
Hajrong ini i eh kyntu u yaki tre thaw wow sñiawbha ki u yakrehlang khnang waka chnat i puræ puthi, kamjooh kiwi won ki jait chna wa emkaam ki paidbah lait ki u sahteiñ.
Da pynkut ya kani ka lehkmen ha kani ka sngi da i wai ya u moo sahnaam nei bynta ki bru wa em bynta u wanrah i roi i paar hapoh ka chnong, wa kamjooh u moo sahnaam hei yatoh wa i chna ya sarok Amkoi–Nongbareh Lyntiar Road yong u snem (2013–2014).
Discussion about this post