Kawi ka manyung ha Mynthong, Jowai da yoh ko yei yung thymme wa miat wa paka hadien wa neiliang ka Rotary Club Jowai kawa man ka seiñ kreh mon sñiawbha yei miat i bha ka imlang sahlang haki bynta waphær waphær da chim ko ka laad u yarap ya kani ka manyung deiwa pynchna yung thymme neidaw wa iwa rim man i iwa da yoo emkaam u chna thymme.
Ini i yung toh yong ka Ribil Pyrtuh heiwa da ya sah ki 8 ngut wa kynthup ki khon ko wa ki ksu.
I yung warim ki toh iwa em 3 kamra wei hadien wa da pynchna thymme won da mih i 4 kamra najrong i thawsum wa paikhana.
Ya kani ka yung da wan wow wai da u Wailadmiki Shylla, Montri sorkar hei emlang u President ka Rotary Club Jowai, u Rtn. Rueveny Nongtdu, u Secretary, u Rtn. Montre Passah, u waheh chnong ka Mynthong, u Lamphrang Pohktai najrong kiwi won ki dkhot ka Rotary Club waki dkhot ka dorbar chnong Mynthong.
Haka yalang tbian wa da pynman ha Community Hall ka Mynthong, u Rtn. Rueveny Nongtdu sñiawngooh u ya waroh kiwa embynta u pynman ya kani ka kaam kawa jop nadooh ki para dkhot wa kamjooh ki lok yong oo kamwa ka phang pyrdi hi yong ka Rotary International leh ong ko “Unity For Good”.
Khana u wa yei chna da pyndep hapoh 3 bnai wa kynthup i chna paikhana deilang ka Septic Tank, neitæ i kamra sum, i chna pynheh kamra wei pynthymme lut waroh i yung.
U Wailadmiki Shylla hawa klam ong u dang ynnin wot yoh u wow pynlait paidbah 146 tylli ki Work Order yong ki yung PMAY hapoh sor Jowai lyngba ka Jowai Municipal Board, sñiawkmen u wa ynne yoh biang u kam kani ka jooh ka laad lyngba ka Rotary Club Jowai won kawa da chynna jngai u kner ki laad yarap heiwa da yaroh u leh ya ka neibhah ymtoh de ka sien wa nyngkong wa yarap ko hapoh ka District waka jylla.
Ong u ini man i yatylli wa i e nongmuna ya kiwi, wa hawa em i thrang i angnood wow leh iyi iyi ye bait u pynman kaam lada em ha kawon ka rynsan leh.
Heiyatoh wa i wai ya kani ka yung ong u kiwa pait narood ye ki u klam u ong wa da leh du ya kawi donhi ka yung, tangwa ki tre wa maad won rap sñiawthooh ki hadooh katwon kordor ini i yoh yarap.
Yooluti u wa neini chakhmat leh u nang ye u kreh chooh chooh kani ka Club heiyatoh wow yarap ya ki manyung wa dooh wa duk hapoh ka chnong Jowai.
Hawa khana yei pyrchang ka sorkar u pyntoh pynbiang yeiwa emkaam ki paidbah, ong u ym pu em u bianglut, heiwa kam ka sor Jowai i eh wa dang maad ko katni toh i thaw noh jhep, wei neibynta u rap yasuklang da ban joor u hajrong i emkaam nadooh na yung u pynkhlaad yei jhep wa jhieh weiwa rkhiang, wei lada ye heitæ i rukom, 50% i eh da man iwa da jop chwa.
Ha kani ka sngi pyntip haroh u wa neibynta i chna paikhana, ki paidbah ye ki leh u yoh yarap kamwa Rs. 12,000 naka Jowai Municipal Board.
Discussion about this post