Booh FIR ka chnong Lakadong Ummat pyrchah ya u Secretary wa u Waheh Chnong ka Lama deilang wa palat 20 ngut kiwi

Kiwa chong chnong ka Lakadong Ummat, East Jaiñtia Hills District da booh ujor FIR ki ha Ladrymbai Police Outpost pyrchah ya u Dawan O Rymbai (Waheh Chnong Lama), u Charling Syrti (Secretary Chnong Lama) wa kiwi de deiwa ong wa kini ki bru da maham wei da mut ki leh wow pynyap bru.

Kiwa ujor da ong ki wa ki kam ki tre thaw da kreh da rep ki ha ini i thaw khlem da em kiwa pynthut tangwa ha ka 3 tarik uni u bnai March heipor kamwa 10:30 AM hadooh 11:00 AM heipor wa ki deilang ki khon khynnah da kreh ki ha ini i thaw, da wan ki bru boon ngut wa kynthup ki bru ka NHIDCL deilang u Waheh Chnong wa u Secretary ka chnong Lama wa kiwi de ki bru wym tipmit wei da rah ki da ki tiar pynmynsoo wa kynthup ki suloi wa ki wait heiwa da psiah yabor ki cha kani ka thaw deiwa kam wa wan leh ki ya ka Inspection wei wow thaw (Measurement) yei heh i thaw yow chna ya sarokbah 4-Lane.

Da ong wa ini i wan kini ki bru toh khlem da yoh bor katkam ka aiñ næ deiwa em kiwon kiwon ki bru sorkar nadooh ka yung krehkaam u DC ka District.

Kamtæ hawa yoo ya kini ki bru kiwa da psiah yabor cha kani ka thaw, da mih i yaklam deiwa jai-jai yow kylli yei daw wa wan ki tangwa kini ki bru da pynyoo ki dei bor khlem iwon iwon i daw wei manda joor i ka yania wei pyrchah yeini wa da leh ki pyrchah aiñ, neiliang u Waheh Chnong wa u Secretary Chnong da e hukum ki ya ki bru yong ki wow siat heiwa da em uwi uwa siat chi kuli na ka Air Gun iwa da pyntieñ ya waroh khamtam ki khynnah wa em ha kani ka thaw.

Da ong leh wa hanla chah maham, da yieñ skem ki yow yada yei thaw tangwa kini ki bru dei thmu wow pynmynsoo wei pynyap da kdong ki ya kiwa em heini nadooh ki waheh hadooh ki khynnah deiwa rah wait ha kti wei ym yohsa de ki khlem da yut na kani ka thaw wa mantre ki.

Chooh chooh da ong wa ini wa da jia toh iwa da pynkhreh chwa yow knieh yei thaw deiwa pyntieñ hadooh wow siat suloi hakhmat ki khynnah iwa da pynhær rgnu ya ki.

Related posts

Yap ar ngut ki khynroo hawa liwan na yaseiñ Synod

March 8, 2026

Jop ka Suhana Paul na Ambrose Memorial Sec. School ya ka Science Exhibition ka East Jaiñtia

March 8, 2026

Kamtæ da ong wow emkti da u Waheh Chnong wa u Secretary Chnong kiwa da yooluti wow pait yei suk i saaiñ toh iwa pynemkaam bakla ki yei bor.

Ha kani ka FIR najrong i pyrtuid u Waheh Chnong wa u Secretary Chnong da pynmih leh yei pyrtuid kiwi kiwa em kamwa 28 ngut.

Da pyntip wa i daw wa pynslem wow booh FIR hadooh ka 6 tarik uni u bnai toh neidaw wa da joor tieñ ki khon ki kti ki neiwa jia heiwa da kyntu leh wow pynngat ya kini kiwa emkti hapoh ka Section 109, 189, 191, 329 wa 351 ka BNS 2023 deilang ki kyndon ka aiñ Arms Act wei wow kem noh ya kini ki bru kamjooh ki tiar yasiat wa da pynemkaam ki.