Hajrong ka thong wow yohlaad ki khynnah u ya pynyoo pyntaw bor ha madan najrong i puræ kot hapoh skur, neiliang ka School Managing Committee yong ka Seiñraij LP & UP School Mukhap, Laskein Block ha ka 5 tarik wa ka 6 tarik uni u bnai Wisu da pynman ko ya ka Annual School Sports Meet 2026.
Ha kani ka Annual School Sports Meet da yachimbynta chongchit ki khynnah ha ki yakob waphær wa kynthup nadooh kiwa puræ Class Nursery hadooh kiwa puræ Class VIII.
Ya kani ka Annual School Sports Meet yong uni u snem da wan wow pynhaap pyrda da u Rikut Parien, MDC Saphai Sahsniang kam u kongsan hei emlang u Rangdajied Lapasam, Waheh Chnong Mukhap, ki waheh wasian ka chnong, ki dkhot yong ka School Managing Committee, kiwa sikai wa ki bei ki pa yong ki khynnah.
Ha ka yalang pynkut yong kani ka Sports Meet hei pynlai u Teibor Papang, Chairman SMC da kdar yahkhmat da i ngoohblai da ka Darihun Papang, Asst. Teacher pynbood won i klam e mynsien ya ki khynnah skur na u Rangdajied Lapasam kamjooh leh ki kyntien sneiñ kyntien kroo na u Rikut Parien, katwa ka Kheinkor Niang, Head Teacher Seinraij LPS SSA Mukhap hei pynkut e ko ki kyntien khublei.
U Rikut Parien hei klam da yaroh u ya ka SMC yong kani ka skur kawa da ye u pynman ya kani ka Sports Meet na ki snem cha ki snem wei da ong u leh ini waroh toh man i da i mynsien yakrehlang, chooh chooh da kitbok kitrwiang u leh ya ki khynnah skur wow nang man chooh ki kiwa ye u rah naam rah burom ya ka skur, ka chnong ka thaw ha ki por ki sngi wa chakhmat lyngba ki yalehke Sports.
Discussion about this post