Ha iwi biang i jia wa chah yoobeiñ ki jaitbru ka Northeast, kawi ka kynthai kawa na Manipur wa kawi ka Transgender kawa na Assam da chah tba kti ki ha ki chynrang ha Malviya Nagar, New Delhi hei janmiet ka 8 tarik uni u bnai iwa da pynkhuslai biang ya kiwa na Northeast kiwa sah ha nongbah ka ri.
Katkam wa khana kini ki ar ngut, ini da jia i heipor wa ki dang lai ke ki cha kani ka Park kawa em hajan ka Saket District Court Complex heiwa kini ki chynrang kiwa dang khynroo da sdang ki wow pynemkaam da ki kyntien wow beiñ jaitbru wei manda pyrchah ki yeini da chah pynkhor ki.
Kini ki ar ngut da khana ki wa da chah bok ki ha kini ki bru wei em leh kiwa da sai da u Belt wow sympat deiwa klam leh da ki kyntien wa khlem akor. Uwi na ki da klam u leh ki kyntien wa beiñ jaitbru. Da pyntip ki leh wa ini ymtoh de i sien wa nyngkong wa jia kamni heiwa da hap maad ki boon i chah pyndik ha kani ka thaw wa sah ki.
Neiliang ki pulit da pyntip ki wa mar ya jia ini, da lai ki cha kani ka thaw wei katkam wa pyntip ka kynthai kawa na Manipur, ka deilang ka lok ko dang lai ke ha kani ka Park heiwa da em kini ki chynrang kiwa da klam beiñ wei hadien wa pyrchah ki da chah dat ki.
Ya kani ka kynthai wa mynsoo da kit cha Safdarjung Hospital yow yoh yei sumaar wei da takha ko malu mala.
Ini man i du hadien kattu katni sngi wa jia ha Delhi hi heiwa ki le ngut ki kynthai kiwa na Arunachal Pradesh da chah klam beiñ ki da ki jait kyntien wa da ktah ya waroh kiwa na ka thaaiñ Northeast ka ri.
Discussion about this post