Ka jhaad kit phñiang na Liberia wa pyrtuid ka Shenlong Suezmax wa kit phñiang (Crude Oil) na Saudi Arabia dapoi ko ha Mumbai Port, wei da man ko ka jhaad wa nyngkong wow poi suk cha India na ka Strait of Hormuz nadooh wa sdang ka thma Iran wa Israel-USA.
Kani ka jhaad da kit phñiang ko na Ras Tanura Port, Saudi Arabia ha ka 1 tarik u March wei da mih ko ha ka 3 tarik.
Katkam ka Maritime Tracking Data, kani ka jhaad da em ko ha Strait of Hormuz hadooh ka 8 tarik chwa wow tymplæh ya ka Tracking System wa tip leh kam ka Automatic Identification System (AIS) Transponder. Ka AIS toh kawa hap pynche hawa lai luti tangwa manda poi ko ha Strait of Hormuz da pyndam ko ya ka neidaw ka thma wei da pynche biang ko ka ha ka 9 tarik u March.
Ka AIS Transponder toh kawa emkaam ya waroh ki jhaad wow tip yei pyrtuid ka jhaad, i thaw wa em ko, katwon smat lai luti ko wei cheiwon u lai ko khnang wow lait nei yatyrrah para jhaad wei wow pynsuk yei lai i wan.
Kani ka jhaad dapoi ko ha Mumbai Port ynnin i sngi heipor 1:00 waje wei da sangeh ko ha Jawahar Dweep heipor 6:06 PM. Da kit ko hadooh 1,35,335 metric tonne i phñiang (Crude Oil) ya iwa daw phah cha ki Refinery ha Mahul, Eastern Mumbai.
Ya kani ka jhaad da mantre da ka Shenlong Shipping Ltd wei da pynlai ya ka da ka Dynacom Tanker Management Ltd na Athens. Em ko 29 ngut kiwa kreh wa kynthup ya ki nong India, Pakistan wa Philippines.
Discussion about this post