Hei step synyaaw ka 13 tarik uni u bnai heipor kamwa 2:00 waje, ka Dorbar Chnong Ialong da yoh ko wow kem ya ki ar ngut kiwa chi kurim kiwa na baar chnong kiwa da pynyang da ka jaar (sasi) ha ka wah Myntdu.
Na kini da yoh leh wow kem deilang ki jaar (sasi) wa ki dakha kiwa da ngat ha kini ki jaar kiwa da pynyang ki ha ka wah Myntdu ha ki bynta ka Deiňlieh Pynthor Ialong. Neiliang ka bor chnong da phah ki wow pynlait ya kini ki dakha.
Ya kini ki chi kurim da rah ya ki cha ka Office yong ka Dorbar Chnong Ialong heipor 11:00 waje i step yong ka 13 tarik hi neibynta u bichaar yei rukom leh dusmon yong ki ya ki doh-um. Ha kani ka bichaar da rai pynrem ya ki da ka Committee yong ka Dorbar Chnong Ialong heiwa da phah wow su ya ka Fine ha i dor wa heh wei da lai booh FIR leh pyrchah ya kini ki ar ngut.
Ka Dorbar Chnong Ialong toh kawa da khang pyrchah ya kiwa tong doh-um deiwa pynyang da ki jaar pakhet, da khang pyrchah leh ya kiwa ber dawai pynyap dakha kamjooh da khang pyrchah ko leh ya kiwa dat Bomb pynyap dakha ha waroh chi lynter ka wah Myntdu, wah Myntang nadooh paar Umtishi Ialong hadooh wa yabi ka wah Myntdu chadooh wa yabi wa u pood ka chnong waka chnong Ialong-Tuberkmai Chnong.
Da khang pyrchah ko leh ya kiwa siat kamjooh kiwa pynyap mrad khloo. Da em leh ki kyndon chnong kiwa da kdaw wa lada chem ya kiwa leh pyrchah daw ngat ki hei chah pynchitom ka chnong Ialong.
Da pynkynmoo leh wa da khang pyrchah ya kiwon kiwon kiwa wan khwe sngi næ dei miet wow pynyap dusmon ya ki dakha deiwa pynyang da ki Jaar (Sasi) pakhet ha wah Myntdu, wow briat dawai, u pynyap dakha kamjooh wow tympdung Bomb yow pynyap doh-um, da khang leh wow rah pyrsiej khwe boon tylli, heiwa da chah wow rah du 7tylli donhi ki pyrsiej khwe samen bru.
Lada chem ya kiwa leh pyrchah, ka Committee yong ka Dorbar Chnong Ialong ym maap ko wei daw pynchitom deiwa eh.
Discussion about this post