Ka Sarot I Man kawa man ka seiñ yong ki 11 ngut ki chilok, ha ka 14 tarik da lai e sñiawbha ki da ki sula ki that, ki baam, ki tiar pynemkaam cha kawi ka chnong wa pyrtuid ka Mookhonyung kawa em cheiliang Nartiang ka luti wow lai Moorathut ter ter.
Hachwa wow saam ya ki tiar, da pdiang burom ya ka Sarot I Man da u Waheh Chnong ka Dorbar Chnong Moorathut, u Bok Lamin wei da e kti wow pynlai da ki dkhot ka SIM.
Ya ka yalang da pynlai da u Ram Sumer, uwi na ki dkhot ka SIM wei da yoh yei ngoohblai na u Sienmitre Sumer, katwa yei klam bniah da yoh na u Shape Pasweth.
U Chairman da pyntipmit chwa u ya waroh ki dkhot ka Sarot I Man wa ki kaam khih kaam kreh yong ki.
U Shape da pynche u ya kiwa chong chnong yei kordor i khooid i pliah wa ki khloo ki kjam. Da ong u leh wym toh u smat yachong kurim, neibhah da em ka aiñ wa pyn-eh yeini, heijooh i por ktah ko leh yei chait i tram yong ka bei wa i khonboo leh.
Ong u toh u maya pyn ya i dahi, yow ye u kyntu kynrong ya ka yung ka sem wa ka chnong ka thaw waroh kawi.
U waheh chnong da pynsñiaw u yei ka-it wa ka SIM da wan ko cha ka chnong yong ki, kawa man kawi na ki chnong wa dawa sakhiat yei yarap. E u yei kyrkhu kyrdoh yow nang ye chooh ki u yarap ya ki para bru wa emkaam sakhiat i yarap.
Yoosuk u yoo yei pdiang kiwa chong chnong ya ki tiar ki tar, ki sula ki that, deitæ i mynsien wa kmen. Kani hi pynkmen ko ya ki dkhot ka Sarot I Man waroh wow yoo hawa lai ki kamni, da ong u Jaitdao Sumer, uwa phah ya kani ka khubor.
Discussion about this post