Ka yung bichaar ynne ka sngi da e bor ko wow kset sa 4 sngi ha kti ki pulit (Police Custody) ya waroh 6 ngut ki damok kiwa suba emkit wow lute ya ki le tylli ki kor ATM ha East Khasi Hills. Chwa ini da chah wow kset ki 6 sngi ha kti ki pulit hi.
Chwa wow rah ya kini ki 6 ngut cha ka yung bichaar, da lai yah ki wow leh ya ka Medical Checkup yow tip yei chait i khiah yong ki iwa da leh ha Shillong Civil Hospital.
Kiwa chah kem toh u Salim na Dorakhi, Mewat, Haryana, u Rahul na Bazidpur, Nuh District, Haryana, u John Fishal Lyngkhoi na Umpling, u Joyous Dura na Mawlai Nongkwar, u Rejaul Korim wa u Lius Ali na Assam.
Ynnin ki pulit da lai yah ki ya kini ki bru cha ka kor ATM wa em ha Mylliem heiwa da batai wei pynyoo ki kammon da lute ya ka ATM.
Kam wow pynkynmoo ka ATM kawa nyngkong wa kini ki damok da yoh ki wow lute toh ha ka 21 tarik u Naisan 2025 na Mawkriah heiwa da yoh ki wow tooh Rs. 28,13,100. Ha ka 30 tarik u Kmaichonglad (Dec) 2025 da lute ki ya ka ATM na Smit heiwa da yoh ki wow rah Rs. 35,57,000 wei ka sien wa le toh ha ka 8 tarik u Thohlakhmi (Feb) 2026 heiwa da lute ya ka ATM kawa em ha Mylliem heiwa da yoh ki wow tooh kamwa Rs. 35 lak.
Waroh ka pisa wa da yoh ki wow lute dapoi ko kamwa Rs. 1 klur.
Discussion about this post