Ki pulit ka West Garo Hills ynne ka sngi da kyntait ki yeiwa chah pynbaad lyngba kawi ka Video wa da poor ha kawi ka Facebook Page, heiwa da sñiaw ya kawi ka kynthai kawa da pynbaad wa ki pulit hawa wan kynreh yei yung ko da leh ki khlem da kitkhlieh heiwa da noh da tympra ya ki tiar ki tar wa em hapoh yung.
Ki pulit da ong ki wa da lai kynreh ki yeini i yung katkam ki kyndon ka aiñ tangwa ini i Video da pynpoor ki dei thmu wow pynbood naam ya ki pulit.
Katkam ka kyrwoh na u Superintendent of Police ka West Garo Hills, u Abraham T Sangma da pynche wa i lai kynreh ya itai i yung toh katkam ka kyndon ka Bharatiya Nagarik Suraksha Sanhita, 2023 (BNSS).
Da pyntip wa yei kynreh da yahkhmat da u heh pulit heiwa da riñ Video deiwa em kiwa sakhia wa laitlooid wei da em leh kiwa ha-yung ha-sem kani ka yung.
U SP da ong u wa ini i Video wa da pynpoor ha Facebook toh dei thmu wow yahbakla wei pynbaad thok ya ki pulit.
Chooh chooh da ong u wa lada em kiwon kiwon ki bru næ ki seiñ kiwa kwah wow pait yei Video wa riñ ki pulit ye ki wow wan cha ki District Police yow pait ki yeini wa lai kynreh ki pulit.
Da pynkut deiwa ong wa ki pulit ka West Garo Hills toh kiwa da leh yei kaam deiwa khooid wei katkam ki kyndon ka aiñ hawa leh ki yei kaam.
Discussion about this post