Yoh pynlait ya ar ngut ki kynthai kiwa na East Jaiñtia kiwa mut chah pynbor dai doh ha ka Spa wa em ha Haryana  

Ka Khasi Students’ Union (KSU) Delhi Unit deiwa ya krehlang wa ka Special Police Unit for North East Region (SPUNER), hei miet ka 17 tarik da yoh ki wow pynlait ya ar ngut ki kynthai Pnar kiwa da chah eiñ ha ki kaam chah khayi bru hadien wa kular wow pynyoh kreh ki ha Delhi.

Kini ki ar ngut ki kynthai toh kawi kawa dang 15 snem wei kawi won kawa 18 snem kiwa na East Jaiñtia Hills wei da yah ya ki cha Delhi da kawi ka lok ki kawa na Meghalaya hi yow pynyoh kreh ki ha Delhi wei yeini da leh khlem da tip wei khlem da paan bor na ki bei ki pa ki. Da bien ki wow lai cha Delhi deiwa kular wow pynyoh kreh ha ki yung ki sem ki bru.

Mar ya poi ha Delhi, ya kini ki kynthai da lai yah ki cha kawi ka Spa wa em ha Haryana ha ka 16 tarik. Heini da pynbor ya ki wow lai psiah ki cha ki kaam dai doh. Deiwa leh i tieñ da yoh ki wow Phone cha yung ki yow khana yeiwa jia ya ki kiwa da pyntip wut-wut cha ka KSU Delhi Unit yow paan yarap.

Related posts

Em 3 tylli ki Beat Office ka JHADC wa e kti cha ki bru samen neibynta 3 snem

March 18, 2026

Pynbna u DC ka East Jaiñtia Hills ya ki Number wa emkaam ha kini ki por wa dadpoi i por slap

March 18, 2026

Ka KSU Delhi Unit da pyntip ki cha ki pulit ka SPUNER heiwa da ye wow chem wei lai pynlait ya kini ki kynthai na Haryana wei da lai yah ki cha Meghalaya House wa em ha Delhi.

Neiliang ka President ka KSU Delhi Unit, ka Marbiang Khongwir da ong ko wa ini wa jia toh iwa sñiawkhia bha wei da kyntu ko ya ki bei ki pa wow syndong bha ki neibhah em boon kiwa thok wa chukor.