Ha ka sngi wa ar ka Dorbar Mang Tangka ka JHADC, uwa yahkhmat ka Liang Pyrchah u Andrew Shullai da wanrah u ya ka mat yaklam namo ka Motion heiyatoh wa i e NOC ka JHADC ya ka Shree Cement Limited ha Daistong.
U Andrew hawa e i klam da ong u wa ka JHADC da e ko boon tylli ki NOC ya ki karkhana pynmih khyndaw bilat nadooh u 2003 wei i kaamram yong ka toh wow yada ya i hok ki bru katkam wa da pynkham ha ka Sixth Schedule.
Da ong u wa nawa sdang da e NOC dei em chiboon i yooluti wow yoh myntoi ka Council kamjooh ka jaitbru nadooh i khayi pateiñ, i kamai, i khih i kreh wa kiwi tangwa kat dang lai ki snem ini i yooluti da man i mar dei kangtleiñ.
Chooh chooh da kylli u na ka EC lada em i pyrkhat ya ki kyndon ka NOC chwa wow e ya ka neibhah nadooh wa sdang hadooh katni da man i jooh bait ki kyndon.
Da ong u wa chwa wow e NOC ya ka Shree Cement da em hi namo ym em i lai pait ya ka thaw wow chna ya kani ka karkhana heiwa daw booh ya ka boon tylli ki bynta nadooh ki Manufacturing Unit, ki Power Plant, ki Waste Incinerator wow pynmih bor wa kiwi, deiwa kylli leh lada ka EC pyrkhat ko wow yada ya ki khloo, ki hali rep, kamtæ ter ter wa em ha ini i thaw.
Heijooh i por da kylli u lada pyrkhat ya ki krem wa jrong ha kani ka thaw, hawa tih mar pohkhyndaw lada ym chah ktah ki khamtam i e NOC u waheh chnong deptæ hiar chuki wot u.
Heiyatoh wa i yoh kreh, da kdaw u wa nadooh nachwa em ka kyndon wei man ko i jooh bait heiwa da em mo i pyrkhat kammon u yoh kreh ki khynroo khyllood kiwa da pyndep yei kyrdan puræ waphær waphær na Ri-loom Jaiñtia. Da kdaw u wa wot hadooh kiwa kreh Data Entry Operator leh da wanrah na baar jylla wei wot kiwa kamai truck da hap yakhih ki wa thied truck ki karkhana da ki spah tylli.
I dor i khyndaw-bilat rap toh i ha Assam bar ha Meghalaya wa kiwi kiwa ktah ya ka Council wa ka jaitbru.
Neiliang u Rikut Pareiñ hawa kyrchaan ya ka Motion da ong u wa ki karkhana khyndaw-bilat wanrah i yei yachruit wei yasih donhi hapyrdi ki jan yung jan sem neidaw wa em kiwa kyrchaan wa pyrchah.
Da ong u wa u whaheh chnong boonsien e NOC u khlem kynjoh ktien ya ki paidbah wei hadien hiar chuki wot u kamtæ ka NOC wa e ya ka Shree Cement leh toh u yap ko mar yap ka NOC u waheh chnong.
Da tyrwa u wa ka Council neini toh u pyntip paidbah chwa ko chwa wow e NOC ya ki karkhana kamwa leh hawa e ya ka Land Holding Certificate, Pata wa kiwi ki kot.
Chooh chooh da ong u wa ka JHADC toh u e ko ar tylli ya ki karkhana kawi toh ka Consent to Establish wa ka Consent to Operate.
U MB Rymbai won da ong u wa ka 20 snem tam 80% ka mariang wa chah ktah ha ki karkhana, da toh i por wow em ka kyndon wow myntoi ka Council leh kamjooh.
U Jamshaphrang Pohtam da ong u wa emkaam u em kyndon hawa e NOC kam i yada ya ka mariang, i khih i kreh, i rukom im, wa kiwi wei iyi u myntoi u e NOC khlem myntoi ki paidbah deiwa kylli lada ka Council chah ksih ko wow e NOC.
Da ong u wa katkam wa tip u ka Council yoh ko Rs. 3 lak chi snem na ki karkhana katwa kawi ka karkhana kamai ko da ki spah klur, wei katni em phra tylli ki karkhana mutdur katwon u myntoi ka Council lada phah su ko Rs. 30 klur chi snem na kawi ka karkhana.
Chooh chooh da pynrap u wa ki karkhana ym kheiñkor de ki katni ya ki bor yong ka Council.
Ka Deivipaya Tongper da ong ko wa ym em myntoi na ki karkhana neibhah wa boon ki du i kular hajrong wa man ka jaitbru wa khian, da wan da kiwa boon ngut na baar cheini.
Da kdaw ko leh wa ki karkhana wanrah ki yei yaphær neibhah kut wa man Public Hearing da em bait i awri awra.
Hajrong kini waroh u CEM, u Thombor Shiwat da ong u wa ini waroh sñiawthooh bait ki wei ini toh i kjut wa 25 snem nachwa wa da wanrah da ka Council.
Da ong u wa chisien pyrkhat ym khreh wow e hadien wa yoo yeiwa jia wei hadien won da em kiwa wan tynrooh na Daistong, na ka Elaka kamjooh na ka sorkar jylla deiwa pyntip leh wa da yoh ya ka NOC na ka chnong, ka Elaka kamjooh leh na ka Single Window Agency ka sorkar jylla.
Da khana u leh wa ka Council da thmu ko wow pynkylla ya ka JHADC (Trading by Non Tribal) Amendment Rules i wow myntoi ka Council ym du na ka Shree Cement tangwa na waroh ki karkhana wa em katni.
Discussion about this post