Ka High Court ka Meghalaya, ha ka 18 tarik uni u bnai da pynlait ko ya kawi ka manbei kawa dadep phah kset waroh chi rta ha ka 31-08-21 da u Additional Deputy Commissioner (Judicial), West Jaintia Hills District, Jowai heiwa da rai pynrem ya kani ka manbei deiwa ong wa pynyap ko pyn ya u kurim ko wei pynmynsoo ko ya ka khon hi ko kawa dang 2 snem 8 bnai tangwa ym em chah rai pynrem ko yeiwa chah pynbaad wa pynyap ko ya ko ya u khon ko uwa dang 4 snem.
Ini toh iwa da jia ha ka 28-03-2003 heipor 7:45 i step ha chnong Amlari Model heiwa da pynbaad wa da mih i yamai hapyrdi ki chi kurim heiwa kani ka kurim da dat ko da ka wait ya u kurim ko deilang wa u khon ko uwa dang soo snem heiwa da khlaad noh ki na ini wa jia. Ka khon ko kawa dang 2 snem 8 bnai leh da chah dat ko da ka wait wei kani ka bru hadien wa leh yeini da pynmynsoo ko leh pyn da ka ya ka hi da ka wait.
Ha ka hukum wa da pynmih da ka Justice Revati Mohite Dere, Chief Justice wa u Justice W. Diengdoh, Judge da ong wa ka Sessions Court da rai pynrem ko khlem da ye wow pynsakhiat yeiwa jia wa lada kani ka manbei wa leh yeini neibhah ki sabut wa da pynemkaam toh deiwa mutdur donhi yeiwa jia.
Da ong leh wa da pynemkaam yeiwa phla kani ka manbei wa leh ko yeini tangwa ini won ym em da leh katkam ki kyndon ka aiñ.
Ki bru wa da pynemkaam kam kiwa sakhi leh toh uwi u bru uwa da ong donhi wa heipor wa dang thied kwai u ha iwi i dukan da yoo u yei yalang ki paidbah ha ini i thaw wa jia wei da yoo u yei metyap u kurim kani ka bru wei da yoo leh ya u payu kani ka bru wa chim u ya ka wait na kti yong ka wei ymtip u kiyi wa emkti wow leh yeini i kaam pynyap bru.
Sa kawi won da ong ko wa heipor wa dang sait that ko hajan i yung wa jia ini, da sñiaw ko yeiwa kiad u kurim kani ka bru wei da yoo ko wa mih u cha lait heiwa da pat u hakhmat yung wei heini i por da yoo ko ya ka kurim uni u bru wa mih ko cha lait deiwa ksoh wait ha kti deiwa maham.
Kawi won kawa man kam ka payu uwa yap da ong ko wa heipor wa jia, ka dang sait that ko hajan i yung u payu ko deiwa emlang leh kiwi de kiwa sait that ha kani ka jooh ka thaw, wei da sñiaw ko yei kbai i awri ki bru wa da yap u payu ko wei heini i por da yapler ko wei manda che yong bru ko da pyntip ki wa da yap u payu ko. Tangwa ym em e FIR ki neidaw wa da ya pynbait ki yeini para ki, katwa ya ka FIR da e da u waheh chnong. Da ong ko leh wym ye ko u ong deiwa tikna wa lada em kiwa yoo yeini wa jia.
U diah kani ka manbei da ong u wa sah marjan u wa kini ki chi kurim wei haka sngi wa jia ini da sñiaw u yeiwa em kiwa kiad na kani ka yung wei manda lai u da yoo u ya ka payu u wa mih ko cha lait i yung deiwa ksoh ya ka wait ha kti wei da ah ko pyn da ka ya ka hi na rdang, wei heini i por da lai knieh u ya ka wiat na kti ko wei ka da pat noh ko, heiwa oo leh da takha u heipor wa knieh ya ka wiat. Kamtæ da liwan u cha yung yow biah dawai wei manda wan biang u da tip u wa da yap u khon ka diah u neiwa chah dat da ka wait na rdang wei u kurim ko leh da thiah yap u ha lait i yung. Da ong u leh wa ki pulit da wan ki wow chimkti ya ar tylli ki wait.
Da khana chooh chooh u wa uni u kurim ka payu toh uwa em bru leh chawi wei waroh ka chnong tip ko yeini.
U Investigating Officer won da pyntip u wa heipor wa poi ha kani ka chnong da chem wa em boon ki bru wa da yalang ha kani ka thaw wei da em leh uwa thiah yap ha Footpath wei i metyap uwi won u khynnah da chem napoh yung.
Ya ki metyap da phah cha Jowai Civil Hospital yow leh Post-Mortem heiwa da chem leh ar tylli ki wait najan i metyap kiwa da bi snaam tangwa ym em phah ki cha ka FSL.
U waheh chnong won da ong u wa ym em puræ u ya ka FIR chwa wow soi pyrtuid u ka.
Hawa pait ya kini waroh, ka yung bichaar da ong ko da che wym wa yoo iyi wa jia hapoh yung wei ym tip leh kiyi de wa em hapoh yung. Tangwa ka sabut wa da pynemkaam toh du da iwa phla donhi kani ka manbei kawa chah pynbaad heiwa yeiwa phla ko da chim hapoh ka Section 164 CrPC.
Da chem leh wa ya kani ka bru da kem ha ka sngi wa jia wei ha ka sngi wa bood da lai yah ka hakhmat u Magistrate hadien wa kset ka hapoh thanat wei da chem leh ini iwa phla em boon iwa tlot hei rukom chim ki neibhah ym em da kdaw wa lada e por chwa ya kani kawa chah pynbaad wow pyrkhat ko yeiwa jia.
Ym em leh pyndap ya ka Column 3 wa Column 4 yow khana heiwon kset ya kani ka bru yow yoh por ko wow pyrkhat chwa wow phla heiwa ka Column 3 da ong ko wa u Magistrate ymtoh u pdiang u yeiwa phla kiwa chah pynbaad deiwa smat wei toh u e por ki le kynta yow pyrkhat ki wei ymtoh u yachem ki wa ki pulit ha ini i por wei ymtoh leh u chah wow yaklam wa kiwon kiwon ha ini i por.
Kamtæ da ong wa ym em thoh hadooh katwon da e por wei heiwon da kset ya kani ka bru yow yoh ko u pyrkhat, ym leh kdaw wa yeini wa phla da leh hapoh ka Section 164(4) CrPC, da phah smai ka leh khlem da bood katkam ki kyndon ka aiñ wei ym em leh da pynyoo ya ini wa da phla cha kawa chah pynbaad heiwa ka leh ymtip ko yeini wa em ini wa phla ko kat hadooh wa chah rai pynrem ko.
Hajrong ini waroh, ka High Court da pyndam noh ko ya ka hukum wa da pynmih ha ka 31-08-21 da u Additional Deputy Commmisioner (Judicial), West Jaintia Hills District, Jowai deiwa phah wow pynlait noh ya kani ka bru wei da pyndam noh leh ya waroh iwa da pynbaad ya ka.
Discussion about this post