Ka seiñ JNC ynne ka sngi da pynsñiaw ko yei yaroh wa khroo ya ki pulit ka Ladrymbai Outpost wa ka yung krehkaam u SP ka East Jaiñtia Hills District kiwa da yaleh chitom wow thooh bniah yow pynlait im ya kawi ka kynthai khyllood kawa na ka chnong Wapung Chnong kawa da wiar ha sor Ahmedabad, Gujarat nadooh ka 15 tarik uni u bnai March 2026 heiwa kiwa ha-yung ko ym em de yoh Phone ki ka.
Ini toh hadien wa ka JNC da yoh ko ya i ujor naka bei yong katai ka kynthai kawa wiar, kamtæ neiliang ka seiñ dei sñiawkhia da booh ko da ka FIR ha ka 19 tarik uni u bnai ha Ladrymbai Outpost, wei da i kreh chitom ki pulit hapoh i yahkhmat ka yung krehkaam u SP da chem ya ka wei kattæ da em ko ha luti ko wow wan suk cha yung.
Kani ka bru toh kawa kreh hapoh kawi ka Hotel tangwa da chah pynbiej ko wow kreh cha iwi won i thaw hadooh wa mut ko wow chah dai.
Ka JNC da e ko yei sñiawngooh ya ki bor pulit kamjooh da e leh yei khublei wa kyrpang ya ka Santa Mary Shylla, MLA ka Sutnga-Saipung kawa da chimkhia wow yarap klam ya kani ka bynta wow pynsmat yei kaam.
Tangwa ka JNC da pynskem ko wa ini toh i jia wa sñiawsih iwa da mih nei wym chimkhia yong ka sorkar wow pynyoh kreh ya ki khon khynroo ka Ri Jaiñtia. Dei wym em leh ka Policy krehkaam hapoh jylla hadooh wa boon ki khynroo hap ki wow mih na yung wow lai thooh kaam cha baar ka jylla wei da ngat ki hei chah tyrwa kreh hei jait kaam wym chngaaiñ wei chah yahbakla.
U Nangjan Dkhar, Vice President JNC CEC da ong u wa ka sorkar wym jooh chimkhia ko yei emkaam yong ki laad kamai kiwa man neibynta ki khynroo yong i, wei lada ki Policy krehkaam ki deiwa biang wa ki rukom booh kyrpang em ki, ki khynroo yong i ym emkaam u lai thooh kreh cha baar yow lait ki u maad ya kam kini ki jait jia wa maa.
Chooh chooh da kyntu leh ya waroh ki khynroo ka thaaiñ wow man kiwa husiar chwa u pdiang ya kiwon kiwon ki kaam cha baar ka jylla, wei wow thooh tre bha, u kiar nei chah pynbiej wei wow tip u yada ya idæ, da kyntu leh ya ki bei ki pa wow man kiwa husiar wei wow yah luti ya ki khon wei chwa wow chim ki ya ka rai toh u tip bniah bha iyi i jait kreh wa yoh ki.
Ka JNC da pynkynmoo ko leh wa ha u snem 2024, da sdang ya ka “Save Jaiñtia Mission” wei da booh 5 tylli ki mat dawa, wei kawi toh i dawa wow chna Policy wow thungkaam thungjaam ya ki khon khynroo ha ki karhana wa em hapoh thaaiñ neibynta ki khon tre ri.
Ka seiñ da ong ko wa lada ka sorkar burom ko yeini i dawa, daw ye wow khanglaad yei jia kam ini ya ki khon khynroo khyllood ka thaaiñ.
“Kattu da toh ka por ya ka sorkar wow pynmankaam yeini i dawa wei wow pynskem ya ka mynried ki khon khynroo khnang wa kam ini i jia wa sñiawsih ym jia de ki,” da ong u Nangjan Dkhar.
Discussion about this post