Ki MDC ka Liang Pyrchah ka Khasi Hills Autonomous District Council (KHADC) da chah pynyang ki hadooh 3 kynta ha u CEM, u Winston Tony Lyngdoh uwa da e por wow yachem heipor 12:30 pyrdi sngi tangwa hadooh 3:00 waje leh ym em poi u cha ka thaw kreh ka KHADC.
Neiliang uwa yahkhmat ka Liang Pyrchah, u Titosstarwell Chyne da ong u wa ki MDC da booh por yachem (Appointment) ki wa u CEM heiwa ynnin da e por u wow yachem tangwa neidaw wym lait da e por won ynne heipor 12:30 tangwa hadooh 3:00 waje leh ym pu em poi u cha ka kamra krehkaam u.
U Titos da ong u wa i yachem toh hajrong kiwa boon ki kaam wa hap wow yasyllok neibynta wow lai bait ki kaam ha KHADC neibhah wow ya pynbaad tang wow mih khubor ym em man ko kawa yoosuk wei ymtoh iwa bha.
Da ong u wa ki mat wa ki MDC kwah ki wow yaklam toh yei ieh kaam noh u Standing Counsel, u Themist Diengdoh wa i chah beh kreh chipor (Suspend) u Secretary ka Executive Committee, u D.G. Syiemïong, kamjooh leh wow kyntu khut ya ka dorbar kyrpang yow pynkylla ya ka AD Rules wei wow booddien hajrong ka Grant wa ki MDC toh u yoh ki lyngba ka 15th Finance Commission.
Hawa kut ym em yoh u yachem.
Discussion about this post