Ka West Jaintia Police CC da pynrem ko ya ka Ummulong SC kawa man ka Champion ynnin snem lyngba ka DLS Method ha ka Quarter Final wa ar ynne ka sngi yong ka District Cricket League 2026 wa da pynman da ka West Jaiñtia Hills District Cricket Association, Jowai yow yoh u psiah Semi Final.
Ya ka kylla-khlem da jop da ka West Jaintia Police CC kawa da jied wow Bat nyngkong wei da kamai ko 169 Run na ki 34.1 Over deiwa dooh lut waroh ki Wicket. Na kiwa Bat, u Markini Lathong toh uwa kamai boon Run deiwa yoh 37 Run (Not Out) na ki 69 bol, pynbood won da u Obadaia Bareh (C) uwa kamai 35 Run na ki 31 bol. Na kiwa kawang bol ka Ummulong, u Pynskhem Phawa da yoh u pynhaap 3 Wicket na ki 5 Over, katwa u Heimonlang Lyngdoh da yoh u 2 Wicket na ki 7 Over.
Hawa kdong ya ka thong, ka Ummulong da yoh ko u kamai 87 Run na ki 22.2 Over deiwa dooh 8 Wicket. Hadien neini da haap u slap wa joor wei da yang kamwa chiteiñ kynta hadooh wa ki Umpire da hap noh ki u pynemkaam da ka DLS Method wow rai jop ya ka West Jaintia Police deiwa mynjur ki Captain yong ki ar liang.
Katkam ka DLS Method, ka Score watoh u yoh ka Ummulong ha ki 22.2 Overs toh 150, yow ya ryngkat wa ka Score yong ka liang wa booh thong, tangwa duna ko da 63 Run.
Hawa kyruiñ cha kiwa Bat ka Ummulong, u Sylvester Mylliempdah toh uwa yoh boon Run deiwa yoh 36 Run na ki 42 bol. Na kiwa kawang bol ka West Jaintia Police, u Monjur da yoh u pynhaap 4 Wicket na ki 4 Over wei da yoh u rah yei naam Man of the Match.
Ka yalehke Quarter Final wa le ha ka 28 tarik, ka The Legends (Lissi Pearl) u yachem ko wa ka Wahiajer CS ha Khliehtyrchi Mini Stadium, heipor 9:00 waje i step.
Ya ka Digital Live Score yong kani ka League ye phi u pait ha https://cricheroes.com/tournament/1881561/wjhdca-district-cricket-league-2026/matches/live-matches.
Discussion about this post