Ka 3rd Inter School Football Tournament wa pynlai da ka All Shangpung School Association kawa da sdang nadooh ka 23 tarik hadooh ynin ka 27 tarik, da pynman ka ha ki ar tylli ki bynta namo ki Category kitæ ka Under 14 Boys wa ka Under 18 Boys & Girls.
Ha ka Under 18 Boys, yei naam Champion da yoh rah da ka Lummuroo Hr. Sec. School Shangpung, ka Runner Up won da ka Khad Ar Nor Proceeding Secondary School Shangpung. Yei naam Top Scorer da yoh u Damanki Sutnga (Jersey No.2) na ka Khad Ar Nor Sec. School, yei naam Best Player da yoh da u Kyrshan Sajem (Jersey No. 10) naka jooh hi ka skur katwa yei naam Best Goalkeeper da yoh da u Sonidakut Phyllei uwa na ka Lummuroo Hr. Sec. School Shangpung.
Ha ka Under 18 Girls, yei naam Champion da rah da ka Lummuchai UPS, SSA Shangpung wei yei Runner Up da yoh da ka Kilometre Stones Sec. School Shangpung. Yei naam Best Player da yoh da ka Aijjngsuk Sutnga (Jersey No.7) katwa yei naam Best Goalkeeper da yoh da ka Sohakani Suchiang (Jersey No. 1).
Ha ka Under 14 Boys, yei naam Champion da jop ka Seinraij UPS (SSA) Khliehrangnah katwa yei Runner Up da yoh da ka Kilometre Stones Secondary School Shangpung. Yei naam Top scorer da yoh da u Nangkiew Sungoh (Jersey No. 11), yei naam Best Player da yoh da u Mebatip Sungoh (Jersey No.6) katwa yei naam Best Goalkeeper da yoh da u Wanshai Niang.
Hachwa u kut ka Tournament da em leh ka yalang wa tbian wa pynlai da u Assistant Secretary, u Lamhok Phyllei deiwa emlang kam u kongsan da u President ka Synjuk Ki Dorbar Chnong, u Leadingstar Niang wa u symbood kongsan, u Sport Secretary yong ka JSU Central Body, u Chibaitmi Langstang.
Neiliang u kongsan da e u yei sneiñ ya ki khynnah skur wym hoi u yah kari næ Scooty kulmar dang khynnah katwa dang em hapoh ka 18 snem i rta, wei kani toh da booh aiñ ka Synjuk Dorbar Chnong.
Da klam haroh u yei chah phon wei chah æiñ ki khynnah ha ki kiwa boon ki kaam wa sih kamtæ da emkaam wow chibynta ha ki kaam Sport.
Katwa u symbood kongsan da sneiñ u ya ki khynnah yeiwa emkaam ka Sports hadooh wow man kam ka laad kamai kajih wei wa pynyoh ko leh yei chait i tram i doh i pran.
Discussion about this post