U Superintendent of Police ka East Khasi Hills, u Vivek Syiem da pyntip u wa ki pulit da khut hajir ki ya u bru wa dat wei maham siat ya uwi uwa yah kari kamai Sumo, hadien wa poor i Video ha u bnai wa dep wei hadien wa da yoh ya ka ujor.
Katkam wa pyntip u SP, uni u bru da chah hajir u wow lai mih hakhmat u Investigating Officer ynnin ka sngi wei da e u yei ya krehlang hei takit. Da ong u wa ka takit dang lai ko wei daw chim chooh sa kiwi ki luti.
U Vivek da ong u wa ka suloi wa utai u bru u rah u ha ka 27 tarik u March yow maham bru toh kawa em License, tangwa neiliang ki pulit da kyntu ki ya u Magistrate wow knieh noh ya katæ ka License.
Hawa kylli, u SP da ong wa kani ka kaam pyrchah aiñ toh kawa ye u pynchitom hapoh 3 snem ym kam ki ki damok kiwa chah pynchitom 7 snem deiwa kset. Da ong u wa kani ka khut hajir toh katkam ka kyndon wa da booh da ka Kasari yow phah wan hajir hapoh ka Section 35 (3) BNSS.
Hawa kylli hajrong i embynta wa kiwa yahkhmat næ ki seiñ saiñpyrthai, u SP da ong u wa ki pulit ym tip ki yeini neibhah hawa ka takit ya uni u bru ym em kam u wa emyatoh u wa kawon kawon ka seiñ saiñpyrthai.
Discussion about this post