U Superintendent of Police (SP) ka East Khasi Hills, u Vivek Syiem da ong u wa ynnin ka sngi, da pyntip cha ki pulit wa uwi u khynnah wa dang 16 snem da khlaad u chwa wow poi ha Hospital, wei uni u khynnah toh uwa puræ Class-X.
Hawa pyntip chooh chooh yeini wa jia, u SP da ong u wa uni u khynnah toh uwa liwan chuti cha yung wa sah u ha Motinagar, Shillong, heiwa da mih u wow lai ke heiwa u pa u da phah u ya oo wa liwan yung heipor 5:00 waje i janmiet tangwa hadooh 6:00 waje i janmiet leh ym em poi u, heiwa da em wa Phone na ka Mobile Phone u wa em u ha iwi i yung wa em hajan ka yingkieñ ha Umpling.
Kamtæ kiwa ha-yung u da lai ki cha kani ka thaw wa em ini i yung wei da chem toh wym tip yong bru de u wei da mih snaam u na khmut wei da jngem leh i ktien u.
U SP da ong u wa hawa takit wei pait bniah ki pulit ym em suba wa chah pynyap u tangwa dang yang ya ka Post-Mortem heiwa da suba toh neidaw i pynemkaam drugs hadooh wa poi cha wa yap.
Uni u khynnah wa yap toh u ksu u muktiar wa tip kam u VK Jindal wei da liwan u cha Shillong ha ka 30 tarik u March hadien wa pyndep u ya ka Class-X Exam na Assam Valley School, Tezpur.
Katkam wa khana won u Jindal, uni u ksu u da mih u na yung ki ha ka 31 tarik wa em ha Motinagar yow lai yachem lok ha Laitmukhrah tangwa da chem ya oo na i yung wa em ha Umpling wa sah ar ngut ki khynnah skur wei hadien won da kit ya oo da ka Ambulance ka 108 cha Bethany Hospital.
Kini ki ar ngut ki khynnah wa sah ha ini i yung toh kiwa ya tipmit lok.
Discussion about this post