Kam chibynta i angnood wow uiñ ya ka haw-haw, soo ngut ki Astronaut da mih ki ynne i step wow uiñ talawiar (Orbit) ya u bnai wei ini i man i ka sien wa nyngkong ha ki sanphaw snem.
U Rocket wa kit ya ki soo ngut da mih u na Kennedy Space Centre heipor kamwa 6:35 PM i por ka USA hei sakhi ki hajar ngut ki bru.
Ya ini da pait da ka NASA wei man i kam chibynta yong ka Artemis Moon Mission heiwa kawa kattæ katoh ka Mission-II heiwa ya ka Mission-I da pyndep ha u 2022 kam chibynta ka thong wow phah bru biang cha u Bnai wei wow booh yei thaw kreh wa pura ha u Bnai.
Kini ki Astronaut kynthup ki ya 3 ngut na America – u Reid Wiseman, u Victor Glover wa ka Christina Koch, chirup wa uwa na Canada – u Jeremy Hansen.
Ini i lai luti talawiar ya u bnai u chimpor i kamwa 10 sngi heiwa daw pyrchang ya ki tiar ha ka Spacecraft wa kamjooh wow pynyabi (Docking) wa kiwi ki lieñsuiñ wei daw liwan biang ki cha pyrthai khlem da hiar ha u Bnai ha kani ka kynti.
Kini ki soo ngut daw man ki leh ki bru wow hær jngai dooh na pyrthai heiwa daw skit leh nadien u Bnai iwa man leh i sien wa nynkong wow yoh ki bru wow yoo dei khmat yeini i bynta wa tip kam i Dark Side of the Moon.
Ha ka Artemis Mission-III kawa da booh thong ha u 2027-28, daw pynhiar ya uwi u bru wa kawi ka kynthai ha South Pole u Bnai.
Ka United States da kwah biang ko wow lai cha u bnai khamtam hadien wa booh thong ka China wow phah bru cha u bnai ha u 2030.
Discussion about this post