U heh ka Congress, u Rahul Gandhi ynne da kular u ya ki paidbah ka Karbi Anglong wa lada poi ka Party hei bor, daw pynkrehkaam ya ka Article 244(A).
Ka Article 224 (A) toh kawa da pynpsiah hapoh ka Constitution ha ka 22nd Amendment Act 1969, heiwa da e bor ya ka Parliament wow e jylla (Autonomous State) hapoh ka Assam, heiwa da mih ki kattu katni ki thaw ki jaitbru ri-loom katkam ka Sixth Schedule. Ha kani ka Article da e bor ya ki MDC wow man kam kiwa chna aiñ wa ryngkat wa ki montri ka sorkar heiwa ye ki wow pait ym du wow chna aiñ tangwa wot yei synchaar khadar leh ha Karbi Anglong wa Dima Hasao.
Hawa klam ha ka Rally ha Karbi Anglong, u Rahul Gandhi da ong u wa lada poi ki hei bor daw pynkrehkaam ki ya ka Article 244(A), wow e bor ya ki paidbah wow yada yei rukom im wa kyrpang yong ki.
U Rahul da beiñ u ya ka sorkar BJP deiwa ong wa ka Congress kwah ki yei synchaar wa laitlooid hapyrdi ka sorkar pyrdi wa sorkar jylla tangwa ka BJP kwah bait ko wow synchaar na Delhi.
“I thaw, ka um wa i khloo da chim na phi wow e ya u Adani wa Ambani wow chna karkhana,” da ong u Rahul.
Da ong u wa ka sorkar u Himanta Biswa Sarma da e ko hadooh 18,000 Bigha i thaw cha u Adani, 13,000 Bigha cha u Ambani wa kiwi ki Company wow chna ya ki karkhana wei ini man i pyrchah yei hok manbru.
Chooh chooh da ong u wa u Himanta Biswa Sarma toh uwa baam tooh dooh na ki Chief Minister ha India.
Discussion about this post