Ynne ka sngi ka Raij Jowai da pynman ko yei lehkmen Chaad Sukra hajrong ka phang “Nadooh wa wan hadooh wa lai, Bei Rymaw yei rynyieñ wa pyndap pusai” heiwa da sdang ka lehkmen da ka yalang ha Madan Ryngkaw, Tpep Pale.
Ha kani ka sngi u Montri ka sorkar jylla uwa man u MLA ka Jowai, u Wailadmiki Shylla da man u kam u kongsan ha ka yalang heiwa da yoh ki kyntien pdiang burom na u President ka Seiñraij, u Hercules Toi wa i ngoohblai na u Myown Chyrmang, u Kñi ka Raij Jowai.
Da yoh i klam hajrong ka Chaad Sukra na u SK Lato, uwa da batai yei mut kani ka lehkmen.
Neiliang u Wailadmiki Shylla da e khublei Chaad Sukra u ya ki khon ka Raij Jowai heiwa da pynkymoo u wa nachwa jooh embynta u dei mynsien chongchit ha ka Chaad Sukra heiwa lyngba kini ki rynsan yoh bor u wow em i ngait skem wow yieñ haphrang ki paidbah.
Da ong u wa katni da ku i man sor wei ki khon ki kti da lai puræ ki cha kylleiñ ki jylla wa ka ri wei ini wanrah i ya ka Seiñraij kammon u pynneh yei mynsien maya niam ha kini ki khynroo wa em cha baar heiwa da ye u pynphooh pynjanai ya ka Chaad Sukra kat dang lai ki por.
Chooh chooh da ban joor u yei emkaam u em i yatylli heiwa da kdaw u ya ka Baamphalar kawa ye wow wanrah yei man iwi heiwa da ya baam na u jooh u kchu deiwa ban joor wow pynneh pynsah ya i man kyrpang ka jaitbru Pnar.
U Wailadmiki da kyntu u leh ya ki khynroo wa stat wow chna ya ki Documentary neibhah wa du nei puræ man iwa eh wow sñiawthooh tangwa deiwa yoh i yoo da ki khmat daw pynsuk i ya kiwa boon.
Da khana u wa i kreh ya ka Parking Lot wa Rs. 9 klur tam ha Iawmusiang da lai i chaphrang heiwa ym slem de daw pynlait noh ya ka deiwa kular leh ya ka Rs. 1 klur ya ka Seiñraij Jowai.
Da kyntu u leh wow krehlang wow pynman ya ka Jowai kawa khooid wa jngiar neibhah du wa kaap ya ka Yingkieñ Myntdu da em i noh jhep i noh jakhlia ha tymbud sarok deiwa kyntu i krehlang.
Ya ki kyntien khublei da yoh na u General Secretary, u Arwotki Sumer.
Ha kani ka thaw ynne da pynphooh da ki chaad na ki chnong waphær waphær hapoh ka Raij Jowai kamjooh leh na ka dhab na Sikkim kawa da leh ya ka Singhi Chaam (Snow Lion) Dance.
Hadien na Madan Ryngkaw da pynman yei mih yaaw cha Iawmusiang lyngba ka Biar ka Blai.
Discussion about this post