Ka Anti-Corruption Bureau (ACB) ka Rajasthan ha ka 9 tarik uni u bnai da kem ko ya u sahep IAS warim uwa man leh u Additional Chief Secretary (warim), u Subodh Agrawal na Delhi heiyatoh wa i baamtooh da ki spah klur na ka Jal Jeevan Mission (JJM).
U Agrawal da mih i pytuid u ha ka ACB Case Number 245/2024, heiyatoh wa ki kaam baamtooh na ki kreh JJM ka Public Health Engineering Department (PHED) ka Rajasthan.
Ka ACB da khana ko wa ki company wa pyrtuid ka M/s Shri Ganpati Tubewell Company wa mantre da u Mahesh Mittal wa ka M/s Shri Shyam Tubewell Company wa mantre da u Padamchand Jain da pynkhreh ki ya ki Completion Certificate thok hei pyrtuid ka IRCON International Ltd dei krehlang wa ki sahep ka PHED heiwa da yoh tender ki wow kreh ya kiwa boon ki project. Kini ki ar company da yoh ki ya ki Tender wa chongdor hadooh Rs 960 klur deiwa pynemkaam ya kini ki Certicate thok.
Chooh chooh ka ACB da pynbaad ko wa u Agrawal, katwa dang man u kam u Additional Chief Secretary, PHED chirup wa ki sahep da e ki ya ka Site-visit Certificate wa kiwi ki kot yong ki project wa chongdor palat Rs 50 Klur iwa man pyrchah ya ka aiñ. Da ong ko wa waroh i baamtooh hapoh ka chnat dei pynkreh ya ka JJM da kynjoh i hadooh Rs 20,000 klur deiwa pynemkaam bakla ki sahep ka chnat ya i bor yong ki.
Katkam wa man katni da chah kem 10 ngut ki bru wa kynthup ya u Dinesh Goyal uwa man u Chief Engineer (Administration); K.D. Gupta u Chief Engineer (Rural); Subhanshu Dixit uwa jooh man u Secretary RWSSSMCH uwa man leh u Additional Chief Engineer, Jaipur Zone-II; Sushil Sharma uwa man u Financial Advisor; Niril Kumar u Chief Engineer, Churu; Vishal Saxena, Executive Engineerwa da chah suspend; Arun Srivastava, Additional Chief Engineer warim; D.K. Gaud u Chief Engineer and Technical Member uwa da chongnghiah; Mahendra Prakash Soni u Superintending Engineer wa da chong wa u Mukesh Pathak uwa man u bru samen.
Ki le ngut wa dang yut kynthup ki ya u Mukesh Goyal u Superintending Engineer warim; Jitendra Sharma u Executive Engineer warim wa u Sanjeev Gupta uwa man u bru samen.
Ya i takit hajrong ini i kaam baamtooh da leh hapoh i pait ka Additional Director General ka Smita Srivastava.
Discussion about this post