Kamwa ya ki Dolloi wa ki Sirdar hajrong wa man kiwa pait yei niam wa i shynchaar khadar hapoh ki Elaka wa hap hei pait ka Jaiñtia Hills Autonomous District Council, em ki leh ka bynta u ya ka rymaw wa kynthup ka khyndaw ka chyiap, ki um wa ki khloo kamtæ neiliang ka Leiden University napoh Netherlands chirup i yakrehlang ka Jaiñtia Hills Autonomous District Council, ka Earthree Envira Private Limited wa ka Thomas Jones Synod College ha ka 10-04-26 ka sngi da khut lang ki ya waroh ki Dolloi wa Sirdar ka Ri-loom Jaiñtia ha ka yalang yachem yumut neibynta u pynneh pynsah wei e yada yaka rymaw ya kawa da pynman ha Conference Hall ka Thomas Jones Synod College Jowai.
Ka Anna Notsu kawa wan napoh ka Leiden University Netherlands da khana ko wa i wan yong ka cha kani ka thaaiñ toh waka Ri-loom Jaiñtia man ko kawa em i parom em naam, la hei yatoh i shynchaar ha ki chnong ha ki Elaka, i em ki khloo waphær waphær, tangwa iwi won i eh toh i chahktah ka rymaw, neitæ i daw ong ko da khut lang ya ki Dolloi Sirdar wow yachem ha kam kani ka rynsan yow yaklam yachem yumut hajrong i chahktah ka rymaw, neibhah wa kani man i saja yonglang.
“Ngait O wa ka District Council, ki Dorbar Chnong, ki Dolloi da kreh chitom ki ha jar jiar i bynta, tangwa ym jooh em yachem yumut lang ki, wei na ini da yooluti u ya saam lang ki yei yumut hajrong i eh wa chem lang itæ toh hajrong i chahktah ka rymaw”.
Na kani ka rynsan yooluti ko wow chim ki laad ki luti u leh yi re iyi ya ka mynried yong ka rymaw, khamtam wa kani ka District toh kawa em chiboon ki riti dustur, wei wow em leh i ya jan napyrdi ka dustur riti wa ka rymaw.
U Hambertus Nongtdu uwa man u EM wa pait ya ka Forest ka JHADC hawa klam da ong u, kam ka District Council kawa da pynkupbor daka riti shynchar ka Ri India lyngba ka Sixth Schedule neibynta u pynneh pynsah yei man kyrpang ka dustur riti nadooh i synchaar khadar, ka khyndaw ka chyiap wa ki khloo ki um ki wah, da pynkynmoo haroh u wa ka Council dadep pynbna ko hapoh ka yung dorbar wow pynbha wei pynkhlan chooh chooh yei rukom krehkaam ki Dolloi wa Sirdar kamjooh wa ki Waheh Chnong na ka aiñ wada em chwa yong u snem 2015.
Hadien wada yoh yaka Presentation na ki khynroo puræ ka Thomas Jones Synod College Jowai kiwa da batai wei pynyoo hajrong i chahktah ka rymaw nadooh i tih mooyong, tih moo, tih chyiap wei pam dieñ, da kdaw haroh ki yei chahktah ka Wah Myntdu deiwa ong toh nei chna ya u sarok Jowai By Pass wa i pynkai tngit wei noh jhep taroi ki paidbah.
Neiliang u Dolloi ka Elaka Jowai u Puramon Kynjing hawa chim ya ka bynta u klam da ong u, “Ha’o sñiawthooh hi i wa em i ka bynta wow yada ya ka rymaw, tangwa manda boon ware ki aiñ kulmar kiwa pynkrehkaam”, deiwa pynrap wa i tlot bor ki Dolloi katni toh nei boon ware ki aiñ wa kynthup ka aiñ NGT, Forest, ka aiñ ka sorkar jylla, aiñ ka sorkar pyrdi wa kiwi kiwi kiwa kreh ha jar jiar i bor.
Hei yatoh wa i e NOC u Dolloi da ong u iwa kongsan wei nyngkong dooh hi toh na ki Waheh Chnong heiwa kam ki Dolloi ymye de ki u ong iyi yi sadu u e mynjur donhi.
Hei yatoh i pam deiñ, chna sarok leh da ebor hi daka sorkar lyngba ki chnat waphær.
Kam u Dolloi Elaka Jowai da khana u wa hadooh katni ya ki Khloo Niam dang pait sumaar hi ki, wei neibynta ka Wah Myntdu chisien chisnem jooh em ka lehniam kamjooh i engooh edem ya ka rymaw yow yoh yei chait i khiah.
U Dolloi Puramon Kynjing mynjur u leh wa ya ki da pynkupbor da ka JHADC katkam ka aiñ wow krehkaam ki heiyatoh wa ka rymaw, tangwa kini neh ki hei thoh donhi khlem krehkaam.
I chem wa sñiawsuk u hei krehkaam kam u Dolloi toh wa hawa pam dieñ tæ mih i kajia marjan pood, i kaam bichar poi ko chaki Dolloi, tang mar ya dep pynbait da ya pam hi ki katwa ngait.
Neitæ hawa e NOC chna sarok leh da e hi da ki Waheh Chnong, tang manda mih i kajia won dei por miet leh hap chong yalang lada toh i kaam wa jhan. Wei hawa pynyasuk da batai leh ya ki kyndon wa emkaam u yada rymaw tangwa ki bru sorkar jubab ki wa da em lut ki ya ki aiñ iada rymaw.
Hajrong ini pynrap u deiwa ong, “Hawa boon ware ki aiñ kulmar kiwa pynkrehkaam, wei hawa yachem pra heh da poi cheiwa khor wada yieñ sadu u nga. Kamtæ kyntu O wow booh i kyntien nga neibynta u yada rymaw, wei hawa leh iwon iwon i kaam emkaam u pyrkhat leh ya ka, la dei lehkhooid næ thung dieñ”.
Ha kani ka sngi da yoh leh I klam na u Dr H.H. Mohrmen napoh ka Earthree, u Dolloi Elaka Narpuh u Manbha Kyndon, u Dolloi ka Shangpung u Chanky Langbang wa kiwi, hei emlang kiwa sikai wa ki khynnah skur.
Discussion about this post