Ynne ka sngi, u S.K. Lato hei sakhilang ki khon ka Niamtre yong ka Raij Jowai da pynlait paidbah u ya ka kot wa e pyrtuid “Ka Seiñraij Kam Ka Seiñ Niam”.
Ha ka yalang wa tbian yong kani ka sngi da emlang u Deibha Rymbai, Secretary Niamtre Committee ka Seiñraij, u Ladwan Dkhar, Chairman Art & Culture Committee wa u H. Toi, President ka Seiñraij Jowai.
Chwa wow pynlait paidbah ya ka kot, da e u H. Toi ya ki kyntien sñiawngooh ya u S.K. Lato uwa hei rta wa da heh da kreh chitom u wow pynmih ya kani ka kot neibynta i myntoi ki khon ka Seiñraij Jowai ki wow man kiwa rap pateiñ ya ka Seiñraij ha ka mynstep mankawi.
Chooh chooh da kyrsu kyntu u leh ya ki khon ka Seiñraij Jowai kiwa yoh u puræ ya kani ka kot wow bichaar pynchong yurim ki ka deitæ i dur i wow e mynsien ya uwa thoh khnang yow nang ye chooh u wow pynmiat pynjanai ya ka ha ki por kiwa chakhmat.
Neiliang u S.K. Lato da ong u wa i daw wa pynman ya oo wow pynmih ya kani ka kot toh wa kwah u wa ki khon ka Seiñraij Jowai kiwa im ha kani ka juk ka por wa katni u tip ki chaphang ki kaam ka Seiñraij hei yahkhmat ki waheh wasian, ki manbei manpa, ki khynroo khyllood yong ki por wa da lai hadien u snem 1947 ter-ter khamtam ha ki por kiwa oo da embynta u wa ka Seiñraij kam u General Secretary nadooh u snem 1966-1976 neitæ kam u President nadooh u snem 1976-1984.
Ya kani ka kot u S.K. Lato da e sñiawbha u ka cha ka Seiñraij Jowai wei da pynbna u leh wa kani ka kot toh ka hok kynti yong ka Seiñraij Jowai.
Hadien i pynlait paidbah, neiliang u S.K. Lato da e sñiawbha u leh ya kani ka kot cha ka Niamtre Committee, ka Women’s Welfare Committee, Ka Khynroo Khyllood Committee wa cha ka School Managing Committee.
Discussion about this post