I pynkhreh wow pdiang ya ka lympung Sengkhihlang wa 36 da ka Seiñraij Muthlong ha chnong Muthlong, West Jaiñtia Hills District ka wow man ha ka 17, 18 wa 19 tarik uni u bnai da man ko kawa lai bait lai ryntih nadooh i chna ya ki pandal, ka rynsaan, ki luti syngkieñ, neitæ i chim bynta ki paidbah hei pynkhooid pynpliah ya ka chnong ka thaw wa kiwi kiwi.
Neiliang ka Seiñraij Muthlong lyngba u President u Eimi Lyngdoh wa u Wanteimi Ymbon General Secretary hawa klam da ong ki wa pdiang sñiawbha ki ya waroh ki paidbah na ki Seiñ Raij Seng Khasi waphær waphæ ka bri u Ynñiawtrep cha kani ka lympung Sengkhihlang, wei da kyntu ki leh ya ki paidbah wa wan lympung u yakrehlang ki chirup wa ki bor pait pynlai yaki luti syngkieñ khnang wow lait na iwon iwon i sahkut kari.
Lyngba i wan kani ka lympung da ong ki wa yoh ki leh boon i myntoi na ki chnat sorkar heiwa na ka PWD da yoh ki kamwa 11 km u sarok hapoh chnong deiwa ekhublei leh ya u MLA ka thaaiñ u Commingone Ymbon, neitæ ka chnat PHE, Health wa kiwi tawon.
U Mario Biam uwa man u General Secretary Sengkhihlang ong u, i yumut hi kani ka lympung toh yow lum u lang ya ki khon ka bru u Ynñiawtrep Ynñiawskum chisien chisnem na kawi ka thaw cha kawi tawon ka thaw, wa deiwa yoh u yachemlang ye leh u wanrah chiboon i myntoi hei thij i pyrkhat ki khon Seiñ Raij Seng Khasi.
Yooluti u leh wa kani ka lympung wow man ha Muthlong u wanrah ko yei myntoi ha man uwi pa kawi kiwa wan, wei u rah ki leh chaki chnong ki thaw yongki yei myntoi wa yoh hei thij i pyrkhat lyngba kani ka lympung.
Discussion about this post