Ka Voice of the People Party daw sdang ko yei yakhih pyrchah ya ka sorkar MDA-II deiwa chim ya ka phang kawa yatoh wa ka Lumpongdeng heiwa da khut paidbah ko wow mih ki ha ka 22 tarik uni u bnai ha Motphran kam chibynta ka yakhih neibynta kiwi de ki kaam deiwa pynbaad wa leh ka sorkar da kiwa man pyrchah ya ki jaitbru tynre.
Kani ka yalang paidbah da booh por wow sdang heipor 2:00 waje i sngi kawa man leh wow yakhih pyrchah ya ka Taj Resort & Spa kawa da thmu wow chna ha Umiam.
Chooh da ong wa ka yakhih man ko leh kam chibynta kiwi ki kaam nadooh i wym em khooid i krehkaam ka Meghalaya Public Service Commission (MPSC), ki District Selection Committee (DSC) deilang i hok kiwa sikai skur wa kiwa chong wa sah cha khappood.
Yeini da pynbna da u President ka VPP, u Ardent Miller Basaiawmoit deiwa pynbaad ya ka sorkar wa yahkhmat ka NPP wym tip ko u ap u pyrkhat yei sñiaw ki paidbah khamtam heiyatoh wow e wai yei thaw 60 snem yow chna ya ka Taj Resort & Spa kamjooh ka soskular neibynta ka Lumpongdeng.
U Ardent da ong u wa da toh i por wow pynyoo dei kaam neibynta i bha i miat ki paidbah wei ka Party ym ye de ko wow yang yeiwa pynche ka sorkar.
Da pyntip wa kani ka yakhih daw pynman ka leh cha kiwi thaw ka Khasi wa Jaiñtia Hills.
Discussion about this post