Ka JAC yong ki ar seiñ, kitæ ka JHTOA wa EJHTOTA, ynne ka sngi da pynman ko ya ka yalang paidbah ha Tahkhniang wa em ha Tuber Kmaichnong heiwa da chim ya ka rai wa waroh ki Truck ka Star Cement wa Dalmia Cement u khang noh yei lai i wan ki.
Neilian u Chairman ka JAC, u Biangshwa Shylla da ong u wa kini ki ar tylli ki karkhana toh kiwa thok ki neipor cheipor ymtoh kamwa dadep yakut.
Da ong u wa nadooh ka 24 tarik uni u bnai khlem da booh por hadooh mynnu u pynkut, daw khang noh ya ki kari ka Star Cement wa Dalmia kiwa mih na East Jaiñtia Hills yow lai cha kiwi ki thaw wei kamjooh leh ki kari kiwa wan na kiwi ki thaw yow lai cha kini ki ar tylli ki karkhana wa em ha East Jaiñtia Hills.
Da khana u leh yei chah lehbeiñ khamtam ha ka Star Cement heiwa ki kari hadien wa dep su Slip ki yow lai kit mar tangwa da pynyang da 3-4 sngi wei ha ki thaw pynyhaap mar won em i por wa chah pynyang hadooh ar tayaaw.
Da pyntip u leh wa da phah ya ka chithi ha ka 16 tarik uni u bnai cha u heh ka Star Cement tangwa hadooh ynne ka sngi ym em chimkhia u wow e jubab.
Da kyntu u leh ya kiwa yah Truck wa ki tre Truck wow ya krehlang ki neibhah lada jia iwon iwon ym ye wow kitkhlieh ya ki.
Heiyatoh wa ki Bulker Truck da pyntip wa da yoh yei kyrpaad wow pynlait chwa ya ki kari wa da em ha luti kiwa dadep wow kit ki mar, kamtæ da pynlait ya ki deiwa pyrkhat para bru. Tangwa ka yakhih wow khang ya kini ki toh kawa dang pteiñ wei ym pu em kut ko neibhah ym pu em khut yaklam ki tre Bulker.
Neiliang won u Kyrshan Dkhar uwa man kam u Secretary ka JAC da pyntip u wa nadooh ka 22 tarik u April, wow sangeh noh u e Slip ya ki kari ka Star Cement wa Dalmia kiwa lai cha Byrnihat kam ka dak wa sñiawsih yeini wa leh kini ki ar tylli ki karkhana.
Da khut leh ya kiwi ki Association, ki seiñbhalang wow kyrchaan ki ya kani ka yakhih kamjooh kiwa em Truck wow ya ksohktilang ki wa ka JAC.
Discussion about this post